Komiteti i Helsinkit për të Drejtat e Njeriut në Serbi lëshoi një deklaratë për shtyp duke kërkuar që shtetasit rus Antun Bobrisev t’i jepet leje qëndrimi në Serbi.
“Komiteti i Helsinkit për të Drejtat e Njeriut në Serbi është shumë i shqetësuar për fushatën e përhershme të persekutimit të aktivistëve rusë kundër luftës nga Serbia. Shembulli më i fundit është urdhri i Ministrisë së Punëve të Brendshme për Anton Bobrishev që brenda 30 ditëve të largohet nga Serbia, ku jeton me familjen e tij për tetë vjet. Presim që organet e drejtësisë ta anulojnë këtë vendim të apeluar dhe Bobrisev të mund të qëndrojë i sigurt në Serbi”, thuhet në deklaratën e tyre.
Ata kujtojnë se vendimet për revokimin e lejeve të qëndrimit të qytetarëve rusë bazohen në, siç thonë ata, pretendime arbitrare se paraqesin kërcënim për sigurinë e Serbisë
“Asnjë nga qytetarët të cilëve u është hequr leja e qëndrimit nuk është informuar se në çfarë mënyre kërcënojnë sigurinë e Serbisë. Mbajtja e këtyre informacioneve tregon se bëhet fjalë për vendime politike, e jo për të dhëna që kanë të bëjnë realisht me sigurinë e Serbisë”, thonë ata.
Ata pohojnë se me këtë vendim Serbia po u dërgon dy mesazhe. “I pari autoriteteve represive në Rusi se mund të vazhdojnë të llogarisin në bashkëpunimin e Serbisë në luftën kundër kundërshtarëve të regjimit dhe mesazhi i dytë u shkon kundërshtarëve politikë të Vladimir Putinit – anashkaloni Serbinë dhe kërkoni mbrojtje nga persekutimi dhe represioni në ndonjë vend tjetër”
