Presidenti Vladimir Putin të enjten nuk i mohoi pretendimet e SHBA-së se Koreja e Veriut kishte dërguar trupa në Rusi, por tha se i takon Moskës se si të zbatonte klauzolën e saj të mbrojtjes reciproke me Phenianin dhe akuzoi Perëndimin për përshkallëzimin e luftës në Ukrainë.
Shtetet e Bashkuara thanë se kishin parë prova se Koreja e Veriut ka dërguar 3,000 trupa në Rusi për vendosje të mundshme në Ukrainë, një veprim që mund të shënojë një përshkallëzim të rëndësishëm të luftës në Ukrainë.
I pyetur nga një gazetar në lidhje me imazhet satelitore që tregojnë lëvizjet e trupave të Koresë së Veriut, Putin tha: “Imazhet janë një gjë serioze. Nëse ka imazhe, atëherë ato pasqyrojnë diçka.”
Por ai tha se ishte Perëndimi ai që e kishte përshkallëzuar krizën në Ukrainë dhe tha se oficerët dhe instruktorët e NATO-s ishin të përfshirë drejtpërdrejt në luftën në Ukrainë.
“Ne e dimë se kush është i pranishëm atje, nga cilat vende evropiane të NATO-s dhe si e kryejnë këtë punë,” tha Putin.
Shefi i Kremlinit përmendi në mënyrë specifike nenin 4 të marrëveshjes së partneritetit rus me Korenë e Veriut që ka të bëjë me mbrojtjen e ndërsjellë.
“Ekziston neni 4. Ne kurrë nuk kemi dyshuar aspak se udhëheqja e Koresë së Veriut i merr seriozisht marrëveshjet tona. Por ajo që ne bëjmë në kuadër të këtij neni është puna jonë,” tha Putin.
Ai tha se ushtria ruse po lëvizte përpara përgjatë të gjitha seksioneve të frontit në Ukrainë dhe kishte bllokuar një numër të madh trupash ukrainase në rajonin e Kurskut.
