Kanë përfunduar dy ndeshjet e fundit në Albi Superligën e Kosovës, me Ballkanin që ka fituar me rezultat 1-4 si mysafirë i Feronikelit 74’ në Drenas dhe Malisheva që arriti një fitore të rëndësishme kundër Llapit me rezultat 2-1
Feronikeli 74’ – Ballkani 1-4
Feronikeli u rikthye përsëri në Superligë pas një vendimi kontrovers javën e kaluar ku u tha se do të tërhiqen nga gara, derisa ata u përballën me kampionin aktual të Kosovës, Ballkanin. Pjesa e parë ishte shumë më e mirë për Ballkanin ku u shënuan dy gola. Halili shënoi autogol në minutën e 16-të të ndeshjes derisa goli i dytë për Ballkanin erdhi një minutë më vonë dhe u shënua nga Adetunji. Pjesa e dytë filloi më mirë për Feronikelin të cilët shënuan nga penalltia në minutën e 51-të me anë të Sahitit, për të hyrë në lojë, por Ballkani arriti të shënoi me anë të Queven në minutën e 72. Karrica shënoi golin e katër në minutën e 4 shtesë për mysafirët, duke siguruar fitoren e Ballkanit të cilët rimarrin kreun e tabelës në Albi Superligën e Kosovës. Ndërkohë Feronikeli vazhdon të jetë në pozitën e fundit. Feronikeli kthehet në fushë të shtunën më 9 nëntor ku do të luan me Dukagjinin si mysafirë kurse Ballkani do të luan në derbin me Malishevën të cilët janë në vendin e dytë të Superligës së Kosovës
Malisheva – Llapi 2-1
Malisheva ka vazhduar me paraqitje të mira në Albi Superligën e Kosovës ku ka mposhtur Llapin me rezultat të ngushtë 2-1. Sulmuesi Valmir Berisha shënoi dy golat për Malishevën në pjesën e parë në minutën e 8 dhe 28 për t’i dhënë epërsi komode Malishevës në pjesën e parë. Në pjesën e dytë Llapi arriti që të shënoi me anë të Cernavernit në minutën e 68. Llapi u mundua që të kthehet në lojë por pa rezultat derisa Granit Jashari u ndëshkua me karton të kuq në minutën e 90-të te ndeshjes. Ndeshjen e ardhshme Malisheva do ta luan kundër Ballkanit si mysafirë të dielën më 10 nëntor, kurse Llapi luan në derbin kundër Prishtinës në Podujevë po ashtu të dielën. Malisheva me këtë fitore merr pozitën e dytë më 22 pikë, derisa Llapi bie në pozitën e 6 me 15 pikë.
