Irani mbështet çdo vendim të marrë nga Libani në bisedimet për të siguruar një armëpushim me Izraelin, tha të premten një zyrtar i lartë iranian, duke sinjalizuar se Teherani dëshiron të shohë fundin e një konflikti që i ka dhënë goditje të rënda aleatit të tij libanez, Hezbollahut.
Izraeli nisi sulme ajrore në periferitë jugore të Bejrutit të kontrolluara nga Hezbollahu, duke rrafshuar ndërtesat për të katërtën ditë radhazi. Izraeli ka rritur bombardimin e zonës këtë javë, një përshkallëzim që ka përkuar me shenjat e lëvizjes në diplomacinë e udhëhequr nga SHBA drejt një armëpushimi.
Dy burime të larta politike libaneze i thanë Reuters se ambasadori i SHBA-së në Liban i kishte paraqitur një propozim propozim armëpushimi kryetarit të parlamentit të Libanit Nabih Berri një ditë më parë. Berri mbështetet nga Hezbollahu për të negociuar dhe u takua të premten me zyrtarin e lartë iranian Ali Larijani.
I pyetur në një konferencë shtypi nëse ai kishte ardhur në Bejrut për të minuar planin e armëpushimit të SHBA-së, Larijani tha: “Ne nuk po kërkojmë të sabotojmë asgjë. Ne jemi në kërkim të një zgjidhjeje për problemet.”
“Ne mbështesim në të gjitha rrethanat qeverinë libaneze. Ata që po përçajnë janë Netanyahu dhe njerëzit e tij,” shtoi Larijani, duke iu referuar kryeministrit izraelit Benjamin Netanyahu.
Hezbollahu u themelua nga Garda Revolucionare e Iranit në vitin 1982 dhe është armatosur dhe financuar nga Teherani.
Një diplomat i lartë, duke folur në kushte anonimiteti, vlerësoi se duhej më shumë kohë për të arritur një armëpushim, por shpresonte se mund të arrihet.
