Shtetet e Bashkuara mbyllën ambasadën e tyre në Kiev të mërkurën në mëngjes për shkak të asaj që e quajti kërcënim për një sulm të rëndësishëm ajror, një ditë pasi Ukraina përdori raketa amerikane për të goditur një objektiv brenda Rusisë në atë që Moska e përshkroi si një përshkallëzim në luftë.
Më vonë, pasi një sirenë e sulmit ajror në orët e para të pasdites tronditi nervat në kryeqytet, agjencia e spiunazhit ushtarak të Ukrainës tha se Rusia po përpiqej të krijonte panik duke shpërndarë mesazhe të rreme në internet për një sulm masiv me raketa dhe dron.
“Armiku, i paaftë për të nënshtruar ukrainasit me forcë, përdor masat e frikësimit dhe presionit psikologjik mbi shoqërinë. Ne ju kërkojmë të jeni vigjilentë dhe të palëkundur,” tha ai.
Një burim i qeverisë amerikane tha se mbyllja e ambasadës ishte “e lidhur me kërcënimet e vazhdueshme të sulmeve ajrore”. Ambasadat italiane dhe greke thanë se edhe ato i kishin mbyllur dyert. Ambasada franceze qëndroi e hapur, por u bëri thirrje qytetarëve të saj të jenë të kujdesshëm.
Ukraina përdori të martën raketat amerikane ATACMS për të sulmuar një depo armësh brenda Rusisë, duke përdorur lejen e sapo dhënë nga administrata në largim e Presidentit të SHBA Joe Biden në ditën e 1000-të të pushtimit rus të Ukrainës në shkallë të plotë.
Rusia u ka sinjalizuar Shteteve të Bashkuara dhe aleatëve të saj për javë të tëra se nëse i japin leje Ukrainës që të godasë thellë territorin rus me raketa të furnizuara nga perëndimi, atëherë Moska do ta konsiderojë atë një përshkallëzim të madh.
