Lidhja Demokratike e Kosovës sot ka mbajtur mbledhjen e Këshilit të Përgjithshëm ku edhe aprovoi listën e kandidatëve për deputetë sa i përket zgjedhjeve parlamentare të 9 shkurtit 2025.
Këtë listë kreu i LDK-së Lumir Abdixhiku e ka quajtur si më përmbajtësorja e profesionalen që ka sot Kosova.
“Dhe ky votim i sotëm i juaji, do t’i sjellë qytetarëve tanë, votuesve e jetuesve të Republikës, listën më përmbajtësore, më profesionale e më unitare, që Kosova ka sot. Ajo në vete përmban jo vetëm propozimet që burojnë nga vet baza jonë, por mbanë dhe vendimmarrësit e ardhshëm, të katër viteve të ardhshme, të gjithë jetës institucionale e politike në vend”, ka shkruar Adixhiku në Facebook, të mërkurën.
Ai më pas ka thënë se Kosovës i duhet ndryshim, teksa shtoi se pushteti aktual vetëm propagandon.
“Në këtë Republikë të projeksioneve të tyre, porpaganda është qëllim në vete, gjersa përçarja, ndarja e polarizimi jonë i madh, janë përfundim krejt i zakonshëm, të cilin përfundim – nxitësit e urrejtjes – e shijojnë me plot zell”, ka thënë ndër tjerash Abdixhiku.
Tutje, ai ka shkruar për parimet e qeverisjes brenda frymës së kushtetuesmërisë, duke përfshirë mos përzierjen e politikës në drejtësi.
“Në Republikën tonë, nuk ka vend për sulme ndaj drejtësisë, e kategorizim të saj varësisht se kë ka subjekt; përkrahës pushteti ose jo. Në Republikën tonë, pushteti s’bën drejtësinë, pushteti, sikurse secili tjetër është subjekt i drejtësisë”, ka thënë Abdixhiku.
Po ashtu, ai tha se Kosova nuk ka vend korrupsioni, vjedhja e hajnia, duke thënë se janë moralisht të gabuara e jo të arsyetueshme, teksa opozita akuzon Qeverinë e Albin Kurtit për korrupsion.
“Në Republikën tonë, korrupsioni, vjedhja e hajnia, duhet të jenë moralisht të gabuara sepse janë veprime të liga, e jo të arsyetueshme sepse krahasohen me të shkuarën. Një akt amoral, vjedhës ndaj shtetit, është i papranueshëm, i dënueshëm, i gjykueshëm jo sepse është më i madh apo më i vogël se ai paraprak – por se thjeshtë është jomoral! Korrupsioni është i tillë. Korrupsioni do të gjykohet si i tillë. I tashmi, i kaluari dhe i ardhmi pa dallim”, ka thënë Abdixhiku.
