Gazetarët e Guardian Media Group (GMG), grupi editorial i themeluar në vitin 1907 që bashkon gazetën progresive Guardian dhe gazetën e të dielës Observer, janë në grevë sot dhe nesër, për herë të parë në më shumë se 50 vjet.
Protesta historike sindikaliste është organizuar kundër propozimit për shitjen e Observer te Tortoise Media, një botim digjital i krijuar 5 vjet më parë nga një ish-gazetar i njohur i BBC-së, James Harding, dhe një ish-ambasador amerikan në Mbretërinë e Bashkuar, Matthew Barzun.
Në përgjigje të njoftimit të shitjes së gazetës së diel, të bërë nga GMG në shtator, muajin e kaluar anëtarët e National Union of Journalists, sindikatës së gazetarëve britanikë, miratuan një mocion në të cilin thuhej se kalimi i Observer do të ishte një “tradhti” ndaj angazhimit të Scott Trust – që siguron pavarësinë editoriale dhe financiare të grupit – ndaj gazetës.
Nëse blerja do të vijojë, stafit të Observer u është thënë se mund të zgjedhin të japin dorëheqjen vullnetarisht me kushte më të mira, ose, në rast se kalojnë te Tortoise, do të respektohen kushtet dhe termat ekzistues të kontratave.
Harding ka thënë se shitja ofron mundësinë për të forcuar trashëgiminë e gazetës, e cila mban titullin “gazeta më e vjetër e të dielës në botë”.
