Kryetari i komunës së Pejës, Gazmend Muhaxheri dhe Komandanti Italian i Komandes Rajonale Perëndim, Koloneli Rocco Mundo e kanë kaluar një ditë së bashku duke eksploruar viset malore të mbuluara me borë në bjeshkët e Rogovës.
Së bashku kanë vizituar potencialet mahnitëse turistike në disa fshatra të Rugovës për të parë nga afër investimet e komunës dhe të sektorit privat.
Orët e kaluara së bashku ishin një mundësi e mirë për të biseduar për potencialet që ofrojnë bjeshkët e Rugovës dhe për të shikuar mundësitë e promovimit të këtyre potencialeve tek investitorët e mundshëm Italian.
Koloneli Rocco Mundo mbeti i impresionuar nga investimet e komunës së Pejës në zhvillimin e infrastruktures rrugore dhe elektrike duke vënë theksin se ato janë bazë për zhvillim të sektorit privat. Gjithashtu, ai u impresionua edhe nga investimet e sektorit privat, sidomos ato të gastronomisë të cilat i vlerësoi lartë dhe sipas tij ato do të sjellin shumë turizëm në të ardhmen dhe do të ndikojnë në zhvillimin e këtyre fshatrave.
Ky aktivitet i zhvilluar sot në këtë ditë vikendi ishte vetëm një vazhdimësi e bashkëpunimit efektiv të kryetarit Muhaxheri dhe Komandantit Mundo të cilët në të kaluaren e afërt kanë zgjidhur së bashku edhe shumë probleme kritike të qytetarëve të Pejës në zona të ndryshme.
