Shoqatat e dala nga lufta e UÇK-së do të organizojnë pritje për ish-anëtarin e Shtabit të Përgjithshëm të UÇK-së dhe kryetar i Degës së PDK-së në Klinë, Sokol Bashota.
Në njoftimin e lëshuar thuhet se ky organizim bëhet pas kthimit nga Haga, në sheshin “Mujë Krasniqi”, Klinë, ora 12:00.
Zyra e Prokurorit të Specializuar në Hagë, ka pushuar hetimet ndaj Sokol Bashotës pas pesë vjetësh. Këtë e bëri të ditur ditë më parë vetë Bashota me anë të një postimi në Facebook.
“Në vitin 2019 isha ftuar nga Zyra e Prokruroit të Specializuar në cilësinë e personit të dyshuar të intervistohesha nga kjo zyrë. Pas (5) viteve hetime, tani, me datën 19 Shtator 2024 jam njoftuar zyrtarisht se të gjitha hetimet ndaj meje kanë pushuar”.
Pushimi i hetimeve ndaj meje nuk është fitore vetëm e imja, por edhe triumf i pastërtisë së luftës së Ushtrisë Çlirimtare të Kosovës.Gjithnjë kam besuar në pastërtinë e luftës së UÇK-së, i bindur se me asnjë veprim timin dhe bashkëluftëtarëve nuk kemi cënuar normat ligjore dhe ato njerëzore. Pastërtia e luftës së shenjtë të UÇK-së, u konfirmua edhe një herë zyrtarisht. Shfrytëzoj rastin ta falënderoj edhe avokatin tim z. Artan Qerkini për ndihmën profesionale në arritjen e këtij qëllimi”, tha ai.
Bashota sot dëshmoi në ditën e katërt në Dhomat e Specializuara të Kosovës në Hagë, si dëshmitar i 109-të në procesin gjyqësor ndaj ish-krerëve të UÇK-së, Hashim Thaçit, Kadri Veselit, Rexhep Selimit dhe Jakup Krasniqit.
Bashota në seancën e sotme deklaroi se Thaçi nuk ishte në gjendje të lëshojë urdhra për zonat. Ndërsa, duke u përgjigjur në pyetjet e gjyqtarit Christoph Barthe, ai tha se drejtori i Drejtorisë Politike s’e ka pasur këtë mundësi, shkruan Betimi për Drejtësi.
