Asambleistët kryesorë të Lëvizjes Vetëvendosje në Kuvendin Komunal të Prishtinës u përçanë. Berat Lahu dhe Edmond Azemi qëndruan në sallë dhe e bënë kuorumin gjatë votimit të buxhetit komunal për vitin e ardhshëm.
Një bisedë e tensionuar e asambleistëve të së njëjtës parti, me akuza deri në “hajni”, në të cilën u lakua edhe emri i kryeministrit Albin Kurti, i parapriu votimit.
Shefi i asamblistëve të LVV-së në Prishtinë, Gëzim Sveçla e shkuli mikrofonin e kryesuesit të Kuvendit Komunal dhe për këtë tha se u mor në ndalim policor për 48 orë.
Ai, së bashku me asambleistin tjetër, Egzon Azemi dhe Ilir Kërçelin, shefin e kabinetit të kryeparlamentarit Glauk Konjufca, që kishin shkuar në sallën e Kuvendit Komunal, nga e cila doli një video ku ata shihen e dëgjohen duke u marrë me asambleistët bashkëpartiakë që po qëndronin brenda.
Këto pamje treguan zhurmën dhe tensionin mes asambleistëve të kësaj partie që doli përtej atyre ulëseve në Kuvendin e kryeqytetit. U shpërfaqën disa akuza të Lahut për dallavere të zyrtarëve të partisë.
“Nëse të kanë kërcënu me burg, kallxo Për qita po t’bojnë presion”, dëgjohet Egzon Azemi duke i thënë Berat Lahut.
Para një viti, Komuna e Prishtinës, me ndihmën e asambleistëve të LVV-së që e kishin bërë kuorumin, kishte vendosur që një tokë 8 hektarëshe në Badoc të këmbehej me një pronë tjetër gati trefish më të madhe në zonën Prishtina e Re. Këtë vendim, i cili u anulua në shkurt dhe rezultoi me largimin e PDK-së nga koalicioni qeverisës në kryeqytet, e përmendi të hënën asambleisti Lahu në diskutimin me kolegët e tij.
“Kur t’mi kallxoni negociatat për Badocin, unë kam me dalë. Kur t’mi kallxoni negociatat për Badocin… O s’munet me m’shantazhu mu kurrkush. As ti as kurrkush. Se ti e bon… se qekjo shantazh osht”, dëgjohej teksa thoshte ai.
“Interesi i popullit u kanë me ia japë 50 milionë Komunës së Prishtinës a?”, i pyeste Lahu dy asambleistët që i qëndronin përreth.
“Në emër të Albin Kutit janë vjedhë edhe për Badocin. Në emër të Albin Kurtit jam shantazhu”, thotë ndër tjerash asambleisti Lahu
Ai kërkonte llogari nga dy kolegët e tij se pse e kishin bërë kuorumin kur ishte votuar këmbimi i atyre pronave.
“Pse kena nejtë? Pse kena nejtë qitu? Në emër të Albinit ia ke dhanë 50 milionë. Ti i ke dhanë, ti, ti, ti (nuk kuptohet). Albin Kurti i thirrke njerëzit në telefon, i çojshin duart. Dil sqarone atje 50 milionëshin… Mos më bon presion”, shprehet ai.
Pa përgjigje të qartë duket se mbetet një pyetje që Lahu dëgjohet teksa ia bën Sveçlës: “A je thirrë n’emër të Albin Kurtit për me e votu Badovcin?”.
“Ti qeshtu ke thanë, duhet me votu se po thotë kryeministri”, thotë ai.
Herë pas here, Lahu iu thotë asambleistëve Gëzim Sveçla dhe Egzon Azemi që të mos i bëjnë presion Edmond Azemit, i cili qëndronte përkrah tij në sallën e Kuvendit Komunal.
Në mbrëmje, asambleisti Berat Lahu e interpretoi kështu sjelljen vandale të Gëzim Sveçlës në Kuvendin Komunal: “Shkulja e mikrofonit ishte si veprim për të krijuar asocimin kur VV-ja ka diçka të rëndësishme shkulet mikrofoni. Ky ishte aludimi, por Sveçla donte të mbulonte marren e tij për këmbimin e pronave në Badoc”, tha ai në Interaktiv në KTV
Lahu përsëriti se Sveçla e kishte përmendur emrin e Kurtit që të mundësohej kuorumi për këmbimin e tokave.
“Kjo ka sjell thyerjen time të madhe dhe humbjen absolute të besimit në këtë strukturë. VV-ja në Prishtinë e këtu s’po flas për VV-në si tërësi, por për qendrën e Prishtinës që ka degraduar në gjendje që s’po e njoh më. Për rastin të mundësimit të kuorumit për pronat, e kam të konfirmuar se kryeministri Kurti s’ka qenë në dijeni për të votuar. Kurti e kupton disa ditë më vonë nëpërmjet njoftimit se në komunë ka ndodhur këmbimi si skandaloz. Kryesia qendrore e analizon rastin, e kur shohin çka ka ndodhur jepet urdhri të anulohet”, tha ai.
Për ngjarjet e djeshme në Kuvendin Komunal, LVV-ja reagoi nëpërmjet një komunikate, duke thënë se “jo vetëm që distancohet por edhe demanton secilin pretendim” të asambleistit Lahu.
“I njëjti asambleist duke dashur të arsyetojë veten për thyrjen e vendimit zyrtar të Lëvizjes VETËVENDOSJE!, si dhe të mbulojë implikimet e tij personale të bëra sot me ekzekutivin e Komunës me ç’rast si asamblist i LV-së mundësoi kuorumin, kalimin e buxhetit. Po ashtu në rend dite u tentua që përmes tij të kontrabandohet edhe revidimi i planit rregullues të hollësishëm “Zona Ekonomike” si dhe Plani Zhvillimor Komunal (PZhK) 2024-2032 të Kryetarit Përparim Rama. Prandaj ky asambleist sulmon duke formuluar shpifje të kulluara për Kryeministrin Kurti”, u tha në reagim
LVV-ja i akuzoi se seanca ku u votua buxheti komunal u shoqërua me “pazare të pista duke blerë individualisht asamblistë që thirren në përfaqësim të qytetarëve”.
Lidhja Demokratike e Kosovës tha se veprimet e djeshme të LVV-së shpalosën “qartazi kriminalitetin” e kësaj partie, dhe se ky skandal “zbulon pazare të brendshme, të ulëta e të turpshme, të asamblistëve të këtij subjekti në Kuvendin Komunal të Prishtinës”.
“Ky skandal demonstron qartazi se LVV-ja nuk është asgjë më shumë se një burim i pashtershëm i praktikave klienteliste dhe nepotiste, që dëmtojnë rëndë interesin publik. U bëjmë thirrje organeve përgjegjëse të veprojnë pa hezitim dhe të hetojnë deri në fund çdo detaj të kësaj shkelje brutale të standardeve etike dhe ligjore. Vetëm duke dënuar qartë e fort këtë lloj keqpërdorimi mund të mbrohet interesi i qytetarëve”, u tha në reagimin e LDK-së
