Në Gjykatën Themelore në Mitrovicë, të martën është dhënë fjala përfundimtare në rastin ku po akuzohen katër zyrtarë policorë.
Në këtë rast, Korab Pepaj në cilësinë e zyrtarit policor të Njësisë Speciale akuzohet për vrasje në tentativë dhe manipulim me prova, ndërsa Faton Maloku, Samet Uka dhe Muhamet Muqiqi po ashtu zyrtarë policorë të Njësisë Speciale, secili veç e veç akuzohen për “Moslajmërim të veprave penale apo kryerësve të tyre”, raporton “Betimi për Drejtësi”.
Prokurori Sahit Tmava fjalën përfundimtare pasi e dorëzoi me shkrim në gjykatë, tha se Prokuroria mbetet në tërësi pranë aktakuzës së ngritur ndaj të të pandehurve.
Edhe përfaqësuesi i palës së dëmtuar avokati, Milosh Deleviq fjalën përfundimtare e dorëzoi me shkrim në gjykatë.
Ai tha se gjatë këtij procesi gjyqësor pa mëdyshje është vërtetuar se të pandehurit kanë kryer veprat penale për të cilat akuzohen, dhe se mbrojtja e nevojshme të cilës iu referohet i pandehuri Pepaj nuk ekziston pasi nuk janë plotësuar kushtet të cilat e përcaktojnë mbrojtjen e nevojshme.
I njëjti i propozoi gjykatës që të pandehurit të shpallën fajtorë dhe me rastin e shqiptimit të dënimit të merren parasysh rrethanat rënduese.
Fjalën përfundimtare e dorëzoi me shkrim edhe mbrojtësi i të akuzuarit Korab Pepaj, avokati Arianit Koci duke thënë ndër të tjera se mediat janë munduar që rastit t’i japin konotacion politik, por i mbrojturi i tij dhe zyrtarët e tjerë policorë nuk kanë bërë dallime për qytetarët në bazë të nacionaliteteve.
Ai tha se vendi ku kanë qenë policët në detyrë ka qenë pika kryesore e kontrabandimit të armëve, dhe se e tërë ngjarja është inskenuar pasi vetura e cila është gjetur nuk është e njëjta me atë që ka kaluar në pikë-kontroll, pasi është vërtetuar se në veturë është shtënë dy herë, ndërsa ajo është gjetur e dëmtuar në shtatë vende.
Tutje, Koci i kërkoi gjykatës që mos të lejojë që me inskenime dhe me falsifikime të dokumenteve të dënohet një person që nuk ka asnjë njollë në karrierë, dhe i cili në veri të vendit e ka jetën në rrezik nga terroristët, e jo nga shqiptarët e serbët.
Ndërsa, i pandehuri Faton Maloku në fjalën përfundimtare deklaroi se asnjëherë në jetën e tij nuk është ndeshur me ligjin, dhe i kërkoi gjykatës që ta shpallë të pafajshëm.
I pandehuri Maloku tha se asnjëherë nuk e ka mohuar gjuajtjen nga kolegu Pepaj, dhe se e kishte përpiluar një raport në bllokun e tij personal për ta përpiluar pastaj në një raport zyrtar në një moment më të përshtatshëm për shkak të rrethanave në të cilat kanë qenë.
Tutje, ai tha se në momentin kur kishte shtënë Pepaj, e kishe pyetur se a ka qenë i bindur që nuk ka shkaktuar pasoja nga gjuajtja, dhe se i njejti i kishte thënë jo pasi nuk e kishte pasur një qëllim të tillë.
Ai i propozoi gjykatës që ta lirojë nga aktakuza, me arsyetimin se tanimë që një vit janë të suspenduar dhe se janë dëmtuar jashtëzakonisht shumë, pasi edhe është mbajtës i vetëm i familjes.
Kurse, i pandehuri Samet Uka deklaroi se e mbështet fjalën përfundimtare të të pandehurit Maloku, dhe shtoi se për natën kritike nuk e ndien vetën përgjegjës për mosraportimin të rastit, me arsyetimin se nuk kanë pasur asnjë informacion lidhur me dyshimin se është lënduar ndokush, dhe se nuk ka qenë përgjegjësi e tij për përpilimin e raportit në natën kritike. Ndërsa i propozoi gjykatës që të lirohet nga akuza.
Në fund, edhe i pandehuri Muhamet Muqiqi e mbështeti fjalën përfundimtare të të pandehurve Maloku dhe Uka, dhe i propozoi gjykatës që i njëjti të lirohet nga akuza.
Shpallja e aktgjykimit për kբtë rast u cakta për një datë tjetër me 13..12.2024, ne oren 14:00.
Ndryshe, Prokuroria Themelore në Mitrovicë më 3 korrik 2023, ka ngritur aktakuzë kundër Korab Pepajt, Faton Malokut, Samet Ukës dhe Muhamet Muqiqit.
Dispozitivi i parë i aktakuzës e ngarkon Korab Pepajn se në cilësinë e zyrtarit policor, më 10 prill 2023, në rrugën magjistrale Leposaviq-Mitrovicë në pikën e kontrollit të automjeteve në fshatin Lozishtë, saktësisht te “Ura e Bistricës”, ka tentuar ta privojë nga jeta personin tjetër, të dëmtuarin M.J, ashtu që i pandehuri derisa ka qenë në detyrë zyrtare në pikë kontrollin e automjeteve në vendin e lartcekur, i ka dhënë shenjë me bateri që të ndalet të dëmtuarit M., e i cili ishte duke drejtuar automjetin e tij nga drejtimi i Leposaviqit në drejtim të Mitrovicës, ai nuk është ndalur dhe ka vazhduar rrugën
Atëherë, aktakuza thotë se i pandehuri Pepaj ka shtënë dy herë me armën zyrtare, ku e ka goditur automjetin nga prapa dhe me atë rast vozitësi i automjetit M. është goditur me një plumb në krahun e djathtë, ku i dëmtuari ka pësuar lëndime trupore, plagë përshkuese nga arma e zjarrit në regjionin mbi klavikulën e djathtë, plagë shqyese ndrydhëse në regjionin e djathtë të pasëm të kokës, e që bëjnë pjesë në dëmtime të lehta trupore, me pasoja të përkohshme për shëndetin.
Me këtë, Pepaj akuzohet se ka kryer veprën penale “Vrasje në tentative” nga neni 172 lidhur me nenin 28 të KPRK-së.
Aktakuza thotë se në ditën, kohën dhe vendin si në pikën e parë të dispozitivit, i pandehuri Korab Pepaj ka hequr dhe fshehur provat dhe atë dy gëzhojat e predhës së armës pas gjuajtjes me armë zyrtare, me qëllim të pamundësimit të shfrytëzimit të sendit në procedurë zyrtare.
Me këtë, akuzohet se ka kryer veprën penale “Manipulimi me prova” nga neni 389, par.1 të KPRK-së
Kurse, dispozitivi i fundit i aktakuzës i ngarkon Faton Malokun, Samet Ukën dhe Muhamet Muqiqin se në cilësinë e zyrtarëve policorë të Njësisë Speciale, në kohën dhe vendin si më lartë, kanë qenë në detyrë zyrtare në pikën e kontrollit si më lartë, e të njëjtit kanë qenë në dijeni për identitetin e kryerësit të veprës penale “Vrasje në tentativë”, dhe nuk e kanë lajmëruar veprën penale dhe kryerësin e veprës penale tek eprorët e tyre.
Me këtë, akuzohen se kanë kryer veprën penale “Moslajmërimi i veprave penale apo kryerësve të tyre” nga neni 378, par.1, pika 1.2 lidhur me nenin 28 të KPRK-së
