Në konferencën e mbajtur sot në Beograd, “NATO dhe partnerët 2024: përmes besimit në paqe” është thënë se Serbisë i takon të vendosë së çfarë marrëdhënie dëshiron me NATO-n dhe se NATO do ta respektojë atë vendim pavarësisht se çfarë është.
Ish-shefi i Zyrës Ndërlidhëse të NATO-s në Beograd, gjenerali italian Giampiero Romano, tha se Aleanca respekton neutralitetin ushtarak të Serbisë, por se një politikë e tillë e Beogradit nuk e pengon bashkëpunimin.
Ai vlerësoi se opinioni serb “nuk është plotësisht i vetëdijshëm” se sa është arritur tashmë në bashkëpunimin mes Beogradit dhe Aleancës, transmeton Telegrafi.
Ndihmësministri i Punëve të Jashtme të Serbisë, Igor Kuzelka, deklaroi se ekziston një “qëndrim negativ i qytetarëve të Serbisë ndaj NATO-s”.
“Nuk duhet të harrojmë të kaluarën, por duhet të shikojmë nga e ardhmja”, tha Kuzelka, duke iu referuar bombardimeve katërmujore të NATO-s në ish-Jugosllavi në vitin 1999 për shkak të luftës në Kosovë, e cila rezultoi me tërheqjen e ushtrisë dhe policisë nga Kosova
Kuzelka vlerësoi se partneriteti mes Aleancës dhe Beogradit bazohet “në politikën e neutralitetit ushtarak të Serbisë” që “nuk do të thotë izolim, por mundësi për bashkëpunim në lidhje me sfidat ndërkombëtare”.
