Agim Aliu, kryetar i Ferizajt, deklaron se “i gjithë Ferizaji ndodhet në terr”. Mungesën e energjisë elektrike në komunën që ai udhëheq e quan “gjendje të pandodhur më parë”. Ai tha se sot në këtë komunë nuk kishte rrymë mbi pesë orë.
Aliu kërkon ndërmarrjen e veprimeve nga Qeveria në mënyrë të menjëhershme, në mënyrë që reduktimet të marrin fund.
“Vetëm sot, mbi 5 orë pa rrymë i gjithë Ferizaj, e kjo gjendje po vazhdon edhe tani. Në terr familjet, në terr mërgimtarët që kanë zgjedhur të kalojnë festat me familjarët e tyre në vendlindje, në terr bizneset që po humbin mijëra euro çdo orë nga dëmet që sjell mungesa e energjisë elektrike”, shprehet Aliu.
Reagimi i plotë:
I gjithë Ferizaj në terr, kjo është e pashembullt!
Ditëve të fundit e veçanërisht sot, Ferizaj po përballet me gjendje të pashembullt e të pandodhur më parë sa i përket furnizimit me energji elektrike.
Vetëm sot, mbi 5 orë pa rrymë i gjithë Ferizaj, e kjo gjendje po vazhdon edhe tani. Në terr familjet, në terr mërgimtarët që kanë zgjedhur të kalojnë festat me familjarët e tyre në vendlindje, në terr bizneset që po humbin mijëra euro çdo orë nga dëmet që sjell mungesa e energjisë elektrike.
Ndonëse përgjatë 7 viteve, Komuna e Ferizajt ka siguruar investime milionëshe në kapacitete të energjisë elektrike, siç është Nënstacioni 110/35/10 kV që do të përurohet më 31 Dhjetor, prapë ferizajasit, përballen me terr.
Kush do t’i paguaj këto dëme, familjeve e bizneseve ferizajase?
Kërkoj ndërmarrjen e masave të menjëhershme nga Qeveria e Republikës së Kosovës, Ministria e Ekonomisë, KEDS/KOSTT që Ferizaj të trajtohet barabarësisht, që reduktimet e energjisë elektrike të kësaj përmase enorme, pa orar e pa arsye të qëndrueshme të marrin fund
