Ministri i Mbrojtjes, Ejup Maqedonci, ka bërë të ditur se nga 16 dhjetori ka filluar punën stafi i ri i rekrutuar i kuzhinierëve profesional dhe teknik në Forcën e Sigurisë së Kosovës. Maqedonci përmes një postim në Facebook, ka falënderuar të gjithë ata që i dolën në ndihmë FSK-së që të mos ndërpritej asnjë ditë ushqimi i ushtarëve.
Njoftimi i plotë:
Ngritja e kapaciteteve të vetqëndrushmërisë është faktor i rëndësishëm i sigurisë së një vendi. Pena, pushka, buka janë themelet e një shteti në çdo shoqëri, e po të treja këto elemente ruajnë balancën e ushtrisë profesionale.
Ministria e Mbrojtjes kishte vizion të qartë që fundi i vitit 2024 do të shënonte fillimin e një etape të re, atë të ngritjes së kapaciteteve vetanake të resurseve humane profesionale për përgatitjen e ushqimit në kazermat e FSK-së.
Gjersa në publik ngriteshin me apo pa vetëdije teori të ndryshme dhe shpërndaheshin dezinformata të dëmshme, Shërbimi Korrektues i Kosovës dhe Qendra e Studentëve ishin ata që vullnetarisht mundësuan që as edhe një ditë të mos ndërpritej shërbimi i ushqimit për pjesëtarët e ushtrisë sonë, gjersa po jetësohej koncepti i ri i shërbimit me ushqim.
Shpirti atdhetar e kontributdhënës i tyre që shoqëroi çdo ditë nga tetori deri me datën 16 dhjetor të këtij viti është i paçmim, andaj jam tejet i lumtur që sot prita në ministri, Drejtorin e Qendrës së Studentëve – Ekrem Rudari, Drejtorin e Shërbimit Korrektues të Kosovës – Ismail Dibrani, Drejtorin e Mensës – Fahri Osmani, si dhe njëzet e pesë vullnetarët, kuzhinierët dhe stafi mbështetës nga këto dy insitucione.
Falenderues ndaj secilit prej tyre që me punë përmbyllën suksesshëm këtë periudhë kalimtare, gjersa jam i ngazëllyer të jap lajmin se nga data 16 dhjetor ka filluar punën stafi i ri i rekrutuar i kuzhinierëve profesional dhe teknik.
Sistemet e armatimit, ushqimi, dhe as financimi për shkollimin dhe trajnimin e pjesëtarëve të FSK-së në Qeverinë Kurti nuk do të mungojnë asnjëherë e për këtë do të angazhohemi gjithmonë!
