Problemet me energjinë dhe qarkullimin nga reshjet e borës në zonat malore
Reshjet e borës gjate natës kanë shkaktuar ndërprerje të energjisë elektrike në disa zona malore, duke lënë mbi 300 familje pa energji.
Situata më kritike raportohet në njësinë administrative Lekas, ku fshatrat Xerje, Denas, Tudas, Brozdovec dhe Mazrekë janë pa furnizim me energji elektrike.
Probleme të ngjashme janë shfaqur edhe në fshatrat Peshtan dhe Lumas të Moglicës, si dhe në Proger dhe Vranisht, pjesë e Bashkisë Devoll.
Grupet e punës janë në terren dhe po punojnë për riparimin e defekteve dhe rikthimin e furnizimit me energji.
Përveç kësaj, reshjet e borës kanë vështirësuar ndjeshëm edhe qarkullimin e mjeteve në zonat e thella malore. Megjithatë, paraditen e sotme është bërë e mundur hapja e rrugës Shtyllë-Panarit, duke lehtësuar lëvizjen në këtë segment të rëndësishëm.
Prefektura vijon monitorimin e situatës, ndërsa autoritetet u bëjnë thirrje qytetarëve të shmangin lëvizjet e panevojshme në zonat e prekura.
