Çmimet e gazit janë rritur ndjeshëm në tregun e Amsterdamit pas deklaratave të Vladimir Putin, sipas të cilit është tashmë shumë vonë për të zgjatur kontratën që, pavarësisht luftës, ka lejuar kalimin e gazit rus përmes Ukrainës drejt destinacioneve perëndimore.
Kjo kontratë skadon më 31 dhjetor dhe Ukraina ka konfirmuar se nga 1 janari nuk do të lejojë më kalimin e gazit. Rusia thotë se mund të vazhdojë të dorëzojë gaz përmes Polonisë, por vendimi është në duar të Perëndimit.
Nga Sllovakia, një nga vendet e BE-së që varet më shumë nga gazi rus, kryeministri Robert Fico ka kërcënuar me hakmarrje nëse Kievi mbyll rubinetat: sipas Bratislavës, përdorimi i rrugëve alternative do të çonte në rritjen e kostove dhe do të humbiste 500 milionë euro nga tarifat e kalimit të gazit, pasi vendi e ri-eksporton gazin për në Perëndim.
Që kur ka rikthyer pushtetin, Fico, i cili disa ditë më parë u takua me Vladimir Putin në Moskë, ka ndërprerë mbështetjen e vendit të tij (që është anëtar i NATO-s) për Kievin dhe është një nga liderët evropianë që kundërshton paketat e ndihmave të BE për qeverinë Zelensky.
Sllovakia ka konfirmuar gjithashtu se është e gatshme të mirëpritet diskutime paqeje për Ukrainën, siç e ka parashikuar Putin, i cili ka thënë se është i gatshëm të pranojë ndërmjetësimin e Bratislavës, pasi “ka një qëndrim neutral në konflikt.”
Flukset e gazit në rrezik përbëjnë vetëm 5% të totalit të kërkesës së gazit në Evropë, por ndërprerja e tyre do ta detyronte kontinentin të rrisë importet nga Norvegjia dhe – në formë të lëngshme – nga Shtetet e Bashkuara, çka do ta ekspozonte Evropën ndaj pasigurisë që mund të sjellë presidenca e mundshme e Trump.
Ndërkohë, SHBA-ja ka dërguar në Ukrainë furnizimin e saj të parë me gaz: 100 milionë metra kub që arritën si GNL (gaz natyror i lëngshëm) në një terminal grek dhe u ri-gazifikuan dhe u pompuan drejt territorit ukrainas.
Uashingtoni, përmes zëdhënësit të këshillit të sigurisë kombëtare, John Kirby, ka njoftuar gjithashtu një paketë të re ndihmash për sigurinë e Kievi-t, para fundit të presidencës Biden.
Për SHBA-në, hapjet e pretenduara të Putinit për diskutime janë “fjalë boshe”./ Informim.net
