Viti 2024 solli edicionin e 48-të të Copa Americas.
Turneu me i madh në Amerikën Jugore u mbajt nga data 20 qershor deri më 15 korrik, duke u përmbyllur me finalen e madhe.
E, aty u përballën Argjentina e Kolumbia në një dyluftim për më të mirin e kontinentit.
Deri në plasmanin në finale, Argjentina pati punë me Ekuadorin, duke e mposhtur 4-2 pas penalltive në çerekfinale. Aty, Kolumbia eliminoi Panamanë.
Në gjysmëfinale, argjentinasit kishin punë me Kanadanë, që e mposhtën 2-0.
Në anën tjetër, Kolumbia e udhëhequr në fushën e lojës nga James Rodriguez, triumfoi ndaj Uruguait për një vend në finale.
Argjentinasit e Lionel Scalonit hynin në ndeshjen finale për të shënuar historinë dhe për të mbrojtur titullin e fituar para tri vitesh.
Vetëm pas vazhdimeve u mësua fituesi, e që ishte Argjentina me rezultat minimal.
Ishte Lautaro Martinez që ia mundësoi Argjentinës titullin e 16-të në histori të Copa Americas, me një gol të shënuar në minutën e 112-të të takimit.
Ky i fundit qe edhe top golashënuesi i kampionatit me pesë gola.
Në tërë kampionatin u shënuan 70 gola në 32 ndeshje, me një mesatare prej 2.19 golash për ndeshje
Ky ishte triumfi i dytë radhazi i Argjentinës në këtë kampionat, nën drejtimin e Lionel Scalonit dhe i 16-ti në histori, më së shumti ndër kombëtaret tjera.
