I dërguari ndërkombëtar i Bosnjës për paqen të enjten u përpoq të mbante në rrugën e duhur integrimin e vendit në Bashkimin Evropian duke hedhur poshtë urdhrat e parlamentit të Republikës Serbe javën e kaluar që do të kishin bllokuar përparimin.
Ligjvënësit në parlamentin rajonal të Bosnjës të mbizotëruar nga serbët javën e kaluar urdhëruan delegatët serbë në qeverinë qendrore të bllokojnë reformat ligjore të nevojshme për integrimin e Bosnjës në BE.
Përfaqësuesi i Lartë Christian Schmidt, autoritetin e të cilit serbët nuk e njohin, të enjten ndaloi “çdo përpjekje për të zbatuar elementët e rrezikshëm” të atyre urdhrave.
Marrëveshja e Dejtonit që i dha fund luftës etnike 3-1/2 vjeçare në vendin ballkanik në 1995, i dha përfaqësuesit të lartë autoritetin përfundimtar nëse vendime të tilla lejohen sipas marrëveshjes së paqes.
Marrëveshjet e paqes e ndanë Bosnjën në dy rajone autonome, Republikën Serbe ortodokse të dominuar nga serbët dhe një federatë të dominuar nga kroatët katolikë dhe boshnjakët myslimanë, të lidhur në një qeveri të dobët qendrore. Kjo siguroi paqen, por e la Bosnjën jofunksionale si shtet.
Lëvizja e Schmidt të enjten ishte pjesë e përpjekjeve të tij për të ndaluar Bosnjën nga rrëshqitja në një krizë të re politike dhe për të mbajtur avancimin e integrimit në BE.
Presidenti i Republikës Serbe Milorad Dodik është përpjekur për vite të tëra të tërheqë rajonin nga Bosnja dhe ka kërkuar të ndalojë funksionimin e institucioneve shtetërore. Ai është në gjyq në një gjykatë boshnjake me akuzën se ka sfiduar vendimet e Schmidt.
