Bashkimi po vazhdon në formë të lartë, ku mundi Vëllaznimi dhe ndërpreu serinë pozitive të kuqezinjve, duke fituar 84:73 (24:17, 17:13, 27:18, 16:22). Në javën e 16-të të ProCredit Superligës, Sigal Prishtina mundi Borën me rezultat 86:83
Pas një fillimi të baraspeshuar, vendasit në fund të çerekut të parë ishin më të mirë dhe e përfunduan këtë pjesë në të mirë të tyre, 24:17. Prizrenasit për një nuancë ishin më të mirë edhe në periudhën e dytë, për të thelluar më shumë epërsinë dhe për shkuar në pushim me rezultat 41:30.
Në periodën e tretë, vendasit ngritën më shumë epërsinë, ku shifrat pas 30 minutash ishin 68:51. Në dhjetë minutat e fundit, kuqezinjtë tentuan rikthimin, por nuk ia arritën qëllimit dhe Bashkimi triumfoi 84:73.
Te vendasit u dalluan Jayveous Mckinnis me 24 pikë e 20 kërcime dhe Wendell Green me 20 pikë e tetë asistime, ndërsa te mysafirët më i miri ishte Jericole Hellems me 23 pikë e dhjetë kërcime.
Bashkimi numëron 11 fitore e pesë humbje, ndërsa Vëllaznimi tetë fitore e tetë humbje.
Ndersa Sigal Prishtina në një ndeshje me shumë emocione e dramë deri në fund, arriti fitore ndaj Borës me rezultat 86:83 (24:19, 18:22, 23:22, 21:20), në javën e 16-të të ProCredit Superligës.
Në çerekun e parë, Bora kishte epërsi të lehtë, 2:7, por bardhekaltrit u rikthyen shpejt, për të fituar këtë pjesë 24:19. Vendasit vazhduan me lojë të mirë për të thelluar epërsinë në 35:24, por mysafirët u rikthyen shpejt, për të përmbysur shifrat në 39:41, derisa pjesa e parë u mbyll 42:41.
Në periodën e tretë u zhvillua tërësisht lojë e barabartë, 23:22, ku shifrat në semafor pas 30 minutash ishin 65:63. Në dhjetë minutat e fundit u zhvillua dramë deri në sekondat e fundit. Prishtina kishte epërsi 75:65, por Bora nuk u dorëzua dhe riktheu epërsinë në të mirë të saj, 78:81, duke bërë që fituesi të vendosej në fund. Bora ishte duke fituar 80:83, por në momentet vendimtare, Sigal Prishtina ishte më e vëmendshme, me gjashtë pikë radhazi për fitoren 86:83.
Te vendasit u dalluan Ricky Tarrant me 25 pikë e pesë asistime dhe Rashid Mahalbashiq me 22 pikë e shtatë kërcime, ndërsa te mysafirët u dalluan Desmond Cambridge Jr me 26 pikë, shtatë kërcime e shtatë asistime dhe Adem Mekiq me 17 pikë e tetë kërcime.
Sigal Prishtina ka tetë fitore e tetë humbje, ndërsa Bora pesë fitore e 11 humbje
