Arijon Ibrahimovic pritet të mbërrijë në Romë të dielën përpara kontrolleve mjekësore me Lazio, ndërsa Biancocelesti përmbyllin marrëveshjen me Bayern Munich për ish-lojtarin në huazim te Frosinone.
Lazio pritet të finalizojë një marrëveshje me Bayern Munich për Ibrahimovic në ditët në vijim. 19-vjeçari do të transferohet te Stadio Olimpico fillimisht në formë huazimi, me një opsion blerjeje për 8 milionë euro.
Sipas raportimeve nga Gianluca Di Marzio, Bayern ka përfshirë gjithashtu një klauzolë riblerjeje e cila ka vlerën prej 20 milionë eurove.
Kosovari, që luan për Kombëtaren U21 të Gjermanisë, pritet të mbërrijë në aeroportin Fiumicino të Romës të dielën dhe më pas do të kryejë kontrollet mjekësore me Lazio, ndoshta deri të hënën në mëngjes ku do të zyrtarizohet si lojtari i ekipit italian.
Edhe pse ndajnë të njëjtin mbiemër, ai nuk ka asnjë lidhje familjare me ish-sulmuesin e Milanit, Interit dhe Juventusit, Zlatan Ibrahimovic, pasi që Ibrahimovic është nga Kosova dhe ka trashëgimi të një familje kosovare.
Ibrahimovic është pjesë e Bayern-it që nga mosha 13 vjeçare dhe më parë ka luajtur për akademinë e të rinjve të FC Nürnberg.
Në vitin 2023, ai u bë debutuesi i dytë më i ri në historinë e Bayern-it, duke zëvendësuar Leroy Sane në një fitore 3-0 në Bundesliga ndaj VfL Bochum si 17-vjeçar.
Ibrahimovic kaloi sezonin 2023-24 i huazuar në Serie A me Frosinone, ku shënoi një gol në 16 paraqitje. Megjithëse është rritur në Gjermani, Ibrahimovic ka më shumë përvojë në Serie A sesa në Bundesliga në nivelin e futbollit të lartë.
