Bashkimi Evropian ka paralajmëruar se mund të gjobisë, pezullojë apo edhe të ndalojë platformën e mediave sociale X, nëse ajo nuk përputhet me rregullat e BE-së, njoftoi Stephane Sejourne, zëvendës President Ekzekutiv i Komisionit Evropian.
Në një intervistë për “France Inter”, Sejourne theksoi se Komisioni Evropian ka një set rregullash të qarta që duhet të zbatohen nga platformat e mediave sociale, duke përfshirë X, e njohur më parë si Twitter.
Ai kujtoi se komisionerja Hena Virkunen kishte zgjeruar hetimin kundër Elon Musk, pronarit të platformës, për shkak të shqetësimeve lidhur me përputhshmërinë me rregulloret e BE-së.
Sejourne theksoi se raporti i komisionerit do të marrë parasysh të gjitha zhvillimet e fundit, përfshirë ndërhyrjet politike të Musk në Evropë, pas mbështetjes që ai ka shprehur për Alternativën e ekstremit të djathtë për Gjermaninë.
“Sanksionet mund të jenë shumë të forta dhe të arrijnë deri në miliarda euro. Në fund të fundit, kjo mund të çojë në një ndalim të Platformës X,” u shpreh Sejourne.
Ky paralajmërim tregon angazhimin e BE-së për të siguruar që platformat e mediave sociale respektojnë rregullat e transparencës, sigurisë dhe lirisë së shprehjes, si dhe të shmangin ndikimin politik të padëshiruar.
