Trajneri i Manchester City, Pep Guardiola, shprehu besimin e tij te mbrojtësi Abdukodir Khusanov (20), pavarësisht se ai bëri një gabim që i dha golin kundërshtarit në debutimin e tij në Premier League kundër Chelsea-t, përpara se të shpëtohej nga shokët e skuadrës, të cilët u rikthyen për të fituar 3-1.
I transferuar nga skuadra franceze Lens më herët gjatë javës, lojtari nga Uzbekistani dukej i mbingarkuar herë pas here në stadiumin Etihad, dhe nervat e tij nuk u ndihmuan kur i dhuroi Chelsea-t avantazhin në minutën e tretë.
“Është e vështirë për të. Ai stërvitet vetëm një herë dhe më pas luan kundër (Nicolas) Jackson, Cole (Palmer), (Noni) Madueke dhe (Jadon) Sancho. Është një proces kur blen një lojtar kaq të ri. Ai do të mësojë,” tha Guardiola.
Trajneri spanjoll ka përjetuar një periudhë të trazuar muajt e fundit, me humbjen e lojtarëve kyç për shkak të dëmtimeve.
“Ne kemi pasur vështirësi së fundmi, dhe ka qenë një sezon shumë i vështirë. Shumica e lojtarëve janë këtu prej tetë ose nëntë vitesh dhe nuk do të ndryshoj mendimin tim për dy muaj,” shpjegoi Guardiola.
“Duhet të kuptojmë se nuk është e mjaftueshme ajo që po bëjmë – i kërkoj atyre të përmirësohen dhe ata e bënë këtë. Krijuam mjaft raste për të shënuar gola dhe në fund jam vërtet i kënaqur me fitoren,” shtoi ai
