Publicisti Agon Maliqi paralajmëroi për një të ashtuquajtur institut që që është shpërfaqur si platformë “për lansimin e dezinformatave”.
Ai shkroi në një postim në Facebook se ky “institut” që tash po e akuzon opozitën, është vërtetuar se “ka pasur lidhje edhe me shërbimin sekret rus”.
“Kush e aktivizoi institutin IFIMES? Nuk e di se si dhe kur pati ndodhur saktë që njëfarë instituti i Lubjanës me emrin IFIMES e pati fituar njëfarë nami në Prishtinë si entitet i besueshëm i analizave politike. Kjo trafikë matrapazësh me 2-3 veta staf, që prodhon “njohuri” në bazë të asaj se kush paguan më shumë, vitet e fundit është vërtetuar nga shërbimet perëndimore se ka pasur lidhje edhe me shërbimin sekret rus. Para pushtimit të Ukrainës pati dalë me disa analiza krejtësisht në linjën e Moskës dhe shpesh shërben si platformë për lansimin e dezinformatave ruse dhe serbe”, shkroi Maliqi.
“Tani paskan dalur edhe me një analizë për zgjedhjet në Kosovë ku mes tjerash po aludojnë (parafrazoj) se “shtetet e huaja në bashkëpunim me prokurorinë po e përgatisin një skandal kundër kryeministrit Kurti në kulm të fushatës”, dhe e akuzon opozitën në Kosovë se është në krye të një fushate për “katolicizimin dhe bulgarizimin e Kosovës””, shtoi ai.
Maliqi thotë se mediat në Kosovë duhet “të tregojnë kujdes në mënyrën se si i prezantojnë ‘gjetjet’ e këtij ‘instituti’, si dhe të parashtrojnë pyetje se kush financon dhe bashkëpunon me institute të tilla?”.
