Fenerbahce ka bërë një hap të madh drejt fazës tjetër në Europa League pas një fitore bindëse 3-0 ndaj Anderlecht në ndeshjen e parë të fazës “play-off”, e zhvilluar në stadiumin “Sukru Saracoglu”.
Skuadra e Jose Mourinhos e ka treguar forcën që në pjesën e parë, duke e nisur takimin me intensitet të lartë. Vendasit kanë kaluar në epërsi brenda pesëmbëdhjetë minutave të para, kur Dusan Tadic ka devijuar një goditje me kokë nga Yusuf Akcicek, pas një krosimi të Filip Kostic.
Anderlecht ka tentuar të reagojë dhe ka krijuar një rast të mirë për Leander Dendoncker, por portieri Irfan Egribayat ka bërë një pritje vendimtare për ta ruajtur avantazhin. Megjithatë, Fenerbahçe e ka shfrytëzuar momentin më të mirë për të ndëshkuar sërish. Akcicek ka fituar një duel me Tristan Degreef dhe ka pasuar për Kostic, i cili ka krosuar në zonë për Edin Dzeko. Sulmuesi boshnjak e ka parë gjuajtjen e parë të bllokuar, por në tentativën e dytë nuk ka gabuar, duke dyfishuar avantazhin për vendasit.
Goli i dytë i ka rrëzuar moralisht belgët, dhe përpara minutës së gjashtëdhjetë, Fenerbahce e ka mbyllur përfundimisht takimin. Një tjetër kundërsulm i shpejtë e ka gjetur Sebastian Szymański, i cili ka asistour me një kros për Youssef En-Nesyri, që ka realizuar me kokë për rezultatin përfundimtar 3-0.
Me këtë epërsi, Fenerbahce do të jetë në një pozitë të favorshme për ndeshjen e kthimit dhe më pas mund të përballet me fituesin e duelit mes Rangers dhe Olympiacos.
