Presidenti Donald Trump të premten mbrojti mbajtjen e një “qëndrimi të ashpër” ndaj Gazës, enklavës palestineze për të cilën ai ka propozuar marrjen e kontrollit nga SHBA dhe ku është vendosur një armëpushim i brishtë midis Izraelit dhe militantëve palestinezë të Hamasit.
Trump kishte thënë këtë javë se Hamasi duhet të lirojë të gjithë pengjet izraelitë në Gaza deri të shtunën në mesditë ose “le të shpërthejë ferri”.
“Nuk e di se çfarë do të ndodhë nesër (e shtunë) në orën 12. Nëse do të varet nga unë, do të mbaja një qëndrim shumë të ashpër, por nuk mund t’ju them se çfarë do të bëjë Izraeli,” u tha Trump gazetarëve të premten.
Një armëpushim hyri në fuqi pak para se Trump të kthehej në presidencë më 20 janar.
Disa pengje izraelite janë liruar nga Hamasi dhe të burgosurit palestinezë janë liruar nga Izraeli që atëherë.
Zyra e OKB-së për të drejtat e njeriut i ka përshkruar si shqetësuese imazhet e pengjeve të dobësuar izraelitë dhe të të burgosurve palestinezë të liruar, duke thënë se ato pasqyrojnë kushtet e rënda në të cilat ata mbaheshin.
Trump të premten përsëriti shqetësimet e tij për paraqitjet e pengjeve të liruar izraelitë pa komentuar gjendjen e palestinezëve.
Sulmi ushtarak i Izraelit në Gaza, aleat i SHBA-së, ka vrarë më shumë se 48,000 palestinezë që nga tetori i vitit 2023, sipas ministrisë së shëndetësisë së Gazës, dhe ka çuar në akuza për gjenocid dhe krime lufte që Izraeli i mohon. Sulmi zhvendosi brenda vendit pothuajse të gjithë popullsinë e Gazës dhe shkaktoi një krizë urie.
Gjakderdhja e fundit në konfliktin izraelito-palestinez dhjetëvjeçar u shkaktua më 7 tetor 2023, kur Hamasi sulmoi Izraelin, duke vrarë 1200 njerëz dhe duke marrë rreth 250 pengje, sipas të dhënave izraelite.
Trump është përballur me dënimin ndërkombëtar për propozimin e tij për të marrë kontrollin e Gazës dhe për të zhvendosur përgjithmonë palestinezët atje. Ekspertët e të drejtave dhe Kombet e Bashkuara e kanë quajtur atë një propozim për spastrim etnik.
