Neymar Junior është duke u munduar ta rikthejë formën e tij të dikurshme 12 vjet pasi u rikthye tek Santosi.
Një penallti, atë të shndërruar në gol ndaj Agua Santa, ia mundësoi që ta prishte agjërimin prej më shumë se një viti shkaku i lëndimit të rëndë që e kishte pësuar në gju, e i cili ia pamundësoi që t’i tregonte vlerat e tij në Arabinë Saudite, respektivisht në ekipin Al Hilal.
“Të qetë, duhet të jemi të qetë”, deklaroi për “TNT Sports BR” përfaqësuesi brazilian pasi kontribuoi në fitoren me rezultat 3:1,
“Ky është vetëm fillimi i një epoke të re në Santos”, shtoi ai.
Sa i përket kontratës, e cila do të vlejë vetëm në qershor, ish-futbollisti i Barcelonës dhe i Paris Saint-Germainit tha:
“Nuk doja ta bëja një kontratë afatgjate sepse nuk e dija nëse do të kthehesha, nuk e dija se si do të ndihesha duke luajtur. Mendoj se gjithçka mund të ndodh. Kontrata që e kemi bërë, e kemi nënshkruar duke mos menduar që do t’i shërbejë veç njërës palë. Njëri po e ndihmon tjetrin. Santosi po më ndihmon mua, mi ka hapur dyert për ta rigjetur lojën dhe gëzimin”, shtoi Neymar, duke iu përgjigjur deklaratave të babait të tij, i cili tha se i biri nuk ka shkuar në Santos për të qëndruar vetëm pesë muaj
“Santosi e di se çfarë dashurie ndiej për këtë klub, për respektin që e kam për të. Derisa jam në fushë, ku është vendi që më pëlqen më së shumti të jem, do të jap 100% nga vetja. Ta shijojmë këtë moment, çdo ndeshje. Ky është vetëm fillimi i një epoke të re për Santosin, jam i sigurt. Santosi do të ringritet dhe do të rikthehet në krye, ku e meriton të jetë”, nënvizoi tutje Neymar.
Në fund, ai foli edhe për golin e shënuar në kampionatin Paulista.
“Jam i lumtur për lojën që e bëmë, të gjithë duhet të jenë të kënaqur. Ndihem i lumtur sepse po luaj gjithnjë e më shumë, po e ndiej se po përmirësohem fizikisht. Është e qartë se nuk jam ende në 100% të formës sepse i kam luajtur vetëm katër ndeshje, por po përmirësohem”, përfundoi Neymar.
