Gazeta gjermane “Bild” ka raportuar se sipas informacione që ka, Italia është duke u përgatitur për tërheqjen e mundshme të trupave amerikane nga Kosova.
“Sipas të dhënave të Bild-it, Italia është duke u përgatitur për tërheqje të mundshme të trupave të ShBA-së nga Kosova. Aleatët evropianë atëherë do të ishin të vetëm në Ballkan kundër mikut të Putinit, Aleksandar Vuçiq, dhe ushtrisë së tij të fuqishme serbe”, thuhet në artikullin e gazetës gjermane.
Ky zhvillim ka ngjallur shqetësime për ndikimin e mundshëm të këtij ndryshimi në stabilitetin e rajonit dhe në marrëdhëniet ndërkombëtare.
Ish-kolonelë të FSK-së dhe njohës të çështjeve të sigurisë kanë deklaruar për “Front Online” se nëse ndodh tërheqja e trupave amerikane nga Kosova, vendi mund të përballet me tensione, derisa thonë që mundësitë janë të mëdha që mos të ndodh një gjë e tillë.
Ish-koloneli i FSK-së: Kosova është krijuar dhe mbështetur nga Amerika, tërheqja e trupave amerikane do të nxiste tensione
Ish-koloneli i Forcës së Sigurisë të Kosovës, Afrim Veseli, në një prononcim për “Front Online” ka folur për mundësinë e tërheqjes së trupave amerikane nga Kosova, duke theksuar se kjo do të ishte një zhvillim shumë i dhimbshëm.
Sipas Veselit, është e mundur që trupat amerikane të tërhiqen, por kjo varet nga zhvillimet politike dhe diplomatike globale, sidomos pas ardhjes në pushtet të presidentit Trump.
“Me ardhjen e Trump ka ndryshuar shumë çka. Duket ridizajnimi i rendit të ri botëror dhe ndryshimi i aleancave. Tërheqja e ushtrisë amerikane, për ne pjesëtarëve të UCK-së, FSK-së është tepër e dhimbshme, veç të përmendet lëre më të ndodhë”, deklaroi Veseli.
Ai tha se miqësia dhe bashkëpunimi mes FSK-së dhe ushtrisë amerikane kanë qenë kyçe për stabilitetin dhe sigurinë e Kosovës, duke nënvizuar se çdo krizë e sigurisë në rajon është zgjidhur nga prania e ushtarëve amerikanë.
“I gjithë suksesi i FSK-së ndërlidhet me ushtarët amerikan, çdo problem e sfidë që kishim ata i kishim para dhe pas. Çdo problem në fushën e sigurisë që Kosova ka pasur në veri apo jug, ishin ushtarët amerikan prezent dhe çdo gjë ndryshonte. Serbia me falanga tërhiqej”, shprehet Veseli.
Veseli paralajmëroi se një tërheqje eventuale e trupave amerikane mund të sillte pasiguri dhe tensione, sidomos në rajonin e Ballkanit, që mund të çonin në konflikte të reja.
“Kosovës dhe rajonit në Ballkanin perëndimor do t’i sjellë brishtësi dhe konflikte që nëse fillojnë vështirë të menaxhohen. Kosova, Serbia, Maqedonia e Veriut e Mali i Zi e Bosnja, mjafton të mos kenë syrin vrojtues të ushtarit amerikan dhe për pak orë, Ballkani do të shpërthente si në 90’ta e për këtë situatë një ditë politikan të caktuar do ti japin llogari Kosovës për veprimet që sollën qëndrimin amerikan të ndryshoj ndaj vendit”.
Megjithatë, ai shprehu besimin se SHBA-të nuk do ta braktisin Kosovën, duke theksuar se Kosova është krijuar dhe mbrojtur nga Amerika.
“Unë besoj fuqishëm se ushtria amerikane s’do të tërhiqet. Italia dhe trupat e saj edhe nëse e marrin përgjegjësinë për mbrojtën e Kosovës , faleminderit por asnjë në NATO s’janë si amerikanët”, tha ai.
Njohësi i sigurisë: Pa trupat amerikane, Kosova mund të përballet me tensione etnike dhe pasiguri
Njohësi i çështjeve të sigurisë, Drizan Shala, është deklaruar lidhur me lajmin e gazetës gjermane, BILD, lidhur me mundësinë e tërheqjes së trupave amerikane nga Kosova.
Ai tha se megjithëse është e mundur që trupat amerikane të tërhiqen, kjo do të varet nga zhvillimet politike, ushtarake dhe diplomatike.
Sipas Shalës, një ndryshim në strategjinë e SHBA-së ose një angazhim më i fuqishëm i BE-së ose NATO-s mund të çonte në një tërheqje të trupave.
“Po, është e mundur që trupat amerikane të tërhiqen, por kjo do të varej nga zhvillimet politike, ushtarake dhe diplomatike. SHBA kanë ndryshuar politikat e tyre të angazhimit ushtarak në rajon përmes periudhave të ndryshme. Nëse ka një ndryshim të qëndrimeve strategjike të SHBA-së ose një marrëveshje ndërkombëtare, si një angazhim më të fuqishëm të BE-së ose të NATO-s, kjo mund të çojë në një tërheqje të trupave”, tha ai.
Ai paralajmëroi se tërheqja e trupave amerikane mund të çojë në pasoja serioze, duke rritur pasigurinë dhe mundësinë për tensione etnike.
“Tërheqja e trupave amerikane nga Kosova mund të ketë pasoja serioze. Trupat amerikane janë pjesë e KFOR-it, forcave të sigurisë ndërkombëtare që garantojnë stabilitetin dhe mbrojtjen e paqes në Kosovë. Pa praninë e tyre, mund të rritet pasiguria, duke përfshirë mundësinë për tensione të rinovuara mes grupeve etnike”, deklaroi ai.
Profesori i Sigurisë: Tërheqja e trupave amerikane nuk paraqet rrezik për Kosovën
Profesori i Shkencave të Sigurisë, Avni Islami, ka deklaruar se nuk sheh rrezik nëse trupat amerikane tërhiqen nga Kosova, duke theksuar se vendi nuk është i mbrojtur vetëm nga forcat amerikane, por edhe nga trupat e aleancës së NATO-s.
Ai shtoi se nëse trupat e KFOR-it tërhiqen nga veriu, lufta do të bëhej e pashmangshme.
Megjithatë, profesori theksoi se nuk sheh kërcënime të mundshme që mund të çojnë në largimin e trupave të KFOR-it nga Kosova.
“Nuk shoh rrezik nëse tërhiqen trupat amerikane se në Kosovë nuk janë vetëm këta, por janë trupat e aleancës veri atlantike. Nëse merret ndonjë vendim për tërheqjen e trupave të KFOR-it, ajo është çështje tjetër, nëse tërhiqen trupat e KFOR-it nga veriu, lufta është e pashmangshme. Nuk shoh rrezik, kërcënim që mund të tërhiqen trupat e KFOR-it nga Kosova”, shprehet Islami.
