Kryetari i Degës së Lidhjes Demokratike të Kosovës (LDK) në Gjilan, Lutfi Haziri, ka mbajtur një konferencë për media të martën, ku ka shpalosur qëndrimet e partisë lidhur me buxhetin e vitit 2025.
Haziri theksoi se LDK po vepron përtej interesave partiake, duke u fokusuar tek mirëqenia e qytetarëve të Gjilanit, si dhe në mbështetjen e punëtorëve shëndetësorë dhe arsimtarëve.
Ai bëri të ditur se pjesëmarrja e Gjilanit në grantet qeveritare për vitin e ardhshëm arrin në 4.2 milionë euro.
“Gjilani është dhe do të mbetet qytet i demokracisë. Ata që mendojnë ndryshe, gabohen rëndë. Për ne, interesi i qytetit është mbi gjithçka tjetër dhe të enjten do të miratojmë buxhetin për qytetarët, punëtorët shëndetësorë dhe arsimtarët”, deklaroi Haziri.
Ndërkohë, Kuvendi Komunal i Gjilanit do të mbajë nesër një seancë të jashtëzakonshme, ku në rend dite është miratimi i buxhetit për vitin 2025
Seanca pritet të fillojë në ora 10:00
