Kryetari i Partisë Demokratike, Sali Berisha, gjatë prezantimit të programit të tij për ‘Çështjet sociale dhe tregun e punës’, ka ftuar qytetarët të angazhohen fuqishëm në periudhën e mbetur deri më 11 maj, duke theksuar se është koha për të larguar të keqen e madhe që ka mbajtur Shqipërinë në një situatë ekonomike dhe sociale të vështirë. Ai theksoi se fitorja e kësaj beteje është e lidhur ngushtë me suksesin e biznesit dhe se, përkundër rënies së prodhimit dhe eksporteve, është e domosdoshme të bëhen ndryshime të thella
Berisha kritikoi qeverinë për korrupsionin dhe pasuritë e grupeve të lidhura me pushtetin, duke akuzuar se fondet që duhej të ishin investuar për përmirësimin e kushteve të jetesës janë shpërdoruar, duke u shndërruar në pasuri personale për liderët dhe aleatët e tyre. Ai solli shembuj të ndërtimeve luksoze të lidhura me korrupsionin dhe akuzoi administratën e Edi Ramës për përdorimin e parave publike në mënyrë të dëmshme për qytetarët
Për të ardhmen, Berisha premtoi se, pas marrjes së pushtetit, ai do të zbatojë një paketë të fortë ekonomike që do të sjellë ndryshime të menjëhershme për qytetarët, duke siguruar rritjen e pagave dhe pensioneve, si dhe mbështetje për biznesin dhe fermerët. Ai gjithashtu shpalosi vizionin e tij për një Shqipëri që do të kthehet në një qendër të zhvillimit të teknologjisë dhe industrive të avancuara në rajon. Berisha e përmbylli fjalimin e tij duke ftuar qytetarët të punojnë së bashku për të ndaluar atë që e cilësoi si “të keqen e madhe” dhe të nisin një periudhë të re për Shqipërinë.
Pjesë nga fjala e Berishës:
Ne do bëjmë gjithçka për suksesin e biznesit, sepse fitorja e kësaj beteje varet nga suksesi i biznesit.
Ju duhet ta dini se ka tre vite rresht që prodhimi bie nga viti në vit. Fatale!
Nga viti 2023-2024, eksportet janë ulur 32 përqind.
Por eksportet janë prodhim, janë punësim.
Janë sektorë që punësojnë më shumë, janë sektorë që prodhojnë më shumë.
32 përqind. Pse? Nga narkoeurot e narkotrafikantëve, e klubit Rama, e kreut të organizatës kriminale, të cilat futen me kontejnerë, shndërrohen në kulla. Kullat me çmime më të larta se në Londër dhe Paris, rrisin dhe qiratë në stratosferë, i shndërrojnë në mollë të ndaluar dhe zhvlerësojnë euron që u vjen nga jashtë pensionistëve me 38-40 përqind.
Pra, situatë alarmante, emergjente dhe ne kemi vullnetin e hekurt për ta përmbysur këtë situatë tre muajt e parë. Buxheti i parë.
Buxheti i parë do parashikojë këtë paketë dhe do e implementojë këtë paketë.
Askush të mos ketë asnjë iluzion se do mbeten punë publike pa kryer. Jo, absolutisht, do kryhen dhe shumë më tepër.
Por natyrisht me të cilat i bën Kroacia, Sllovenia, që i bëjnë vendet e BE, jo me çmime 14 kontrata për 13 km rrugë.
Është një largim i madh shumë.
Këta drejtues, këta qeveritarë janë shfrenuar totalisht në raport me problematikat e qytetarëve.
Në qoftë se ti si kryeministër të mbijnë sarajet 57 metër të gjata themelet me oborr 8 mijë metra, duke pasur të treguara në ILDKP gjithsej 3800 euro dhe 400 mijë lekë, ti erresh dhe zgjohesh në shpellë hajduti. Ajo shtëpi është shtëpia e hajdutit.
Ti mendon se merr ajër të pastër aty, por shpirti nuk të gjen kurrë qetësinë sepse e ke ndërtuar pikërisht me këto pensione që ke vjedhur, e ke ndërtuar pikërisht mbi djersën e këtyre njerëzve.
Dhe u thua pastaj se fajin e kanë këta që mbajnë punëtorë në të zi. E gjithë administrata është në të zi. Debitori kryesor i fondit të sigurimeve shoqërore është administrata e Edi Ramës.
Jashtë çdo lloj koncepti. Këtej u thotë pensionistëve ju i mbani punëtorët në të zi, ky mban administratën në të zi.
Pra, të gjitha këto kërkojnë një ndërhyrje të fortë, të cilën ne jemi të përgatitur ta bëjmë me shumë sukses.
Ndaj me këtë rast, unë ftoj çdo pensioniste dhe pensionist, ftoj çdo rrogëtar të këtij vendi, çdo rrogëulët, çdo rrogëtar me rrogë të mesme, çdo të ri, që të punojmë këto 70 ditë që kanë mbetur nga 11 maji dhe të ndahemi me këtë të keqe të pakrahasueshme.
Shumë nga ju e dini, Enver Hoxha në diktaturë, edhe ai mbante pensionet, por ai çmimet nuk i rriste ama, ose rritje shumë e lehtë. Rrogat dhe pensionet i mbante të fiksuara. Paratë i fuste në tunele dhe bunkere.
Këta bunkere dhe tunele nuk ndërtojnë, por këta i fusin në konto offshore, këta i shndërrojnë në vila, në hotele, në pallate, në pasuri të tyre.
Ka një dallim këtu, diktatori më gjakësor në Europë pas Luftës së Dytë Botërore, vilën nuk e regjistroi për familjen e tij. Jo, e ndërtoi, ia mori pronën tjetrit, e ndërtoi në pronë të tjetrit, por në dokumente nuk u regjistrua si pronë e familjes së tij.
Kurse këta, absolutisht haptas dhe fshehtas, me emra false, nuk ka njerëz më të pasur se këta sot.
Ndaj dhe është koha, të dashur qytetarë, më 11 maj, të ndahemi me këtë të keqe të madhe.
Dhe unë garantoj se me përparësi absolute, kjo paketë do zbatohet.
Sikundër një paketë po kaq e fuqishme do jetë për biznesin. Një paketë tjetër do jetë për fermerët.
Dhe pas tyre, Shqipëria Madhështore, Shqipëria epiqendër e hightech-ut në rajon do jetë qëllimi ynë
