Ministria e Punëve të Jashtme të Ukrainës ka publikuar në rrjetin X deklaratën e përbashkët pas takimit të sotëm mes delegacionit ukrainas dhe atyre të Shteteve të Bashkuara të Amerikës në Jeddah të Arabisë Saudite.
Në këtë takim u dakordua Ukraina u pajtua me propozimin e SHBA’së për armpushim 30 ditësh.
Kjo është deklarata e plotë:
Sot në Jeddah, Arabi Saudite — nën mikpritjen bujare të Princit të Kurorës Mohammed bin Salman — Shtetet e Bashkuara dhe Ukraina ndërmorën hapa të rëndësishëm drejt rivendosjes së paqes së qëndrueshme për Ukrainën.
Përfaqësuesit e të dy vendeve lavdëruan guximin e popullit ukrainas në mbrojtje të kombit të tyre dhe ranë dakord se tani është koha për të nisur një proces drejt paqes së përhershme.
Delegacioni ukrainas ritheksoi mirënjohjen e thellë të popullit ukrainas ndaj Presidentit Trump, Kongresit Amerikan dhe popullit të Shteteve të Bashkuara për mundësimin e përparimit domethënës drejt paqes.
Ukraina shprehu gatishmërinë për të pranuar propozimin e SHBA-së për një armëpushim të menjëhershëm dhe të përkohshëm 30-ditor, i cili mund të zgjatet me marrëveshje të ndërsjellë mes palëve dhe që varet nga pranimi dhe zbatimi i njëkohshëm nga Federata Ruse. Shtetet e Bashkuara do t’i komunikojnë Rusisë se reciprociteti rus është çelësi për arritjen e paqes.
Shtetet e Bashkuara do të heqin menjëherë pezullimin e ndarjes së inteligjencës dhe do të rifillojnë ndihmën e sigurisë për Ukrainën.
Delegacionet diskutuan gjithashtu rëndësinë e përpjekjeve humanitare si pjesë e procesit të paqes, veçanërisht gjatë armëpushimit të përmendur, duke përfshirë shkëmbimin e të burgosurve të luftës, lirimin e të ndaluarve civilë dhe kthimin e fëmijëve ukrainas të zhvendosur me forcë.
Të dy delegacionet ranë dakord të emërojnë ekipet e tyre negociuese dhe të fillojnë menjëherë negociatat për një paqe të qëndrueshme që garanton sigurinë afatgjatë të Ukrainës. Shtetet e Bashkuara u angazhuan të diskutojnë këto propozime specifike me përfaqësuesit e Rusisë. Delegacioni ukrainas ritheksoi se partnerët evropianë do të përfshihen në procesin e paqes.
Së fundi, presidentët e të dy vendeve ranë dakord të përmbyllin sa më shpejt një marrëveshje gjithëpërfshirëse për zhvillimin e burimeve minerale kritike të Ukrainës, për të zgjeruar ekonominë e saj, për të balancuar koston e ndihmës amerikane dhe për të garantuar prosperitetin dhe sigurinë afatgjatë të Ukrainës
