Thomas Le Bonniec, ish-punonjës i një nënkontraktori të Apple, pohon se ka dëgjuar 46,000 regjistrime të bëra nga asistenti vokal, madje pa dijeninë e përdoruesve. Kompania amerikane është akuzuar se ka shitur informacionet e mbledhura te palë të treta.
Lidhja Franceze për Mbrojtjen e të Drejtave të Njeriut dhe të Qytetarëve e akuzon Apple për shkelje të privatësisë përmes regjistrimeve jo të dakordura dhe trajtimit të paligjshëm të të dhënave personale.
Ajo ka ngritur një padi në Francë muajin e kaluar, kryesisht mbi dëshminë e Thomas Le Bonniec, ish-punonjës i Global Technical Service, një nënkontraktori i Apple që operon në Irlandë.
“Puna ime ishte të dëgjoja 1,300 regjistrime në ditë dhe të korrigjoja transkriptimin që bëhej prej tyre”, shpjegon informatori në mikrofonët e RTS.
Në regjistrimet e asistencës vokale Siri, ai tregon se ka dëgjuar “gjëra jashtëzakonisht intime, të dhëna të natyrës sensibile. Kam dëgjuar shumë fëmijë kur punoja mbi iPad-et.” Po ashtu, informacione mjekësore dhe politike: “Kam dëgjuar dikë që fliste për sklerozën multiple, dikë që fliste për një abort spontan. Për anëtarësimin në sindikatë, preferencat politike”.
Ai pohon se ka dëgjuar rreth 46,000 regjistrime, shumicën e të cilave kishin një kohëzgjatje mesatare prej 15-30 sekondash.
“Disa milionë regjistrime”
Ngjarjet kthehen në vitin 2019. Para se të largohej nga puna, Le Bonniec kishte ruajtur disa pamje të ekranit që dokumentonin aktivitetet që tani po denoncon: një sistem dëgjimi në shkallë të gjerë, që ai e cilëson si distopik.
“Ka prova se bëhet fjalë për disa milionë regjistrime që përfshijnë përdorues nga shumë shtete, të paktën një dhjetë”.
Apple, nga ana e saj, ka njoftuar ndryshime në funksionimin e Siri në gusht 2019.
“Përballë shqetësimeve të përdoruesve, ne e pezulluam menjëherë vlerësimin njerëzor të kërkesave të dërguara në Siri”, shkruante atëherë kompania.
“Para se të pezullohej programi i vlerësimit, kishim zhvilluar një procedurë që përfshinte rivlerësimin e një kampioni minimal të regjistrimeve audio të kërkesave të dërguara në Siri, më pak se 0.2%, me transkriptimet e tyre. Kjo na lejonte të vlerësonim cilësinë e përgjigjes së Siri dhe të përmirësonim saktësinë e saj”.
Që nga ajo kohë, përdoruesit mund të zgjedhin nëse do të marrin pjesë ose jo “në përmirësimin e Siri duke dhënë akses në mostra audio të kërkesave të tyre”.
95 milionë për një marrëveshje në Shtetet e Bashkuara
Në Shtetet e Bashkuara, një padi kolektive nga viti 2019 akuzonte gjithashtu Apple se kishte regjistruar biseda përmes Siri pa dijeninë e përdoruesve.
Konsumatorët i akuzonin gjithashtu gjigantin e teknologjisë për transmetimin e këtyre informacionëve te palë të treta.
Akuzat u hodhën poshtë nga kompania, e cila ka pranuar megjithatë të paguajë 95 milionë dollarë dëmshpërblim për të mbyllur këtë procedurë ligjore.
Për Thomas Le Bonniec, këto praktika përbëjnë rreziqe, përtej praktikave komerciale: “Këto kompani veprojnë sikur janë mbi ligjin. Dhe kjo u jep ide njerëzve të politikës […] që përpiqen të lejojnë policinë të aktivizojë larg nga distanca telefonat inteligjentë të individëve që mund të jenë të përfshirë në çështje trafiku droge, fillimisht, por që do të shtrihen në çdo lloj çështjeje”.
Dhe ai përfundon: “Kur kompanitë private sillen kështu, qeveritë, përfshirë ato që quhen demokratike, mund të inkurajohen të veprojnë në një mënyrë gjithnjë e më autoritare dhe antidemokratike”,shkruan RSI./Informim.net
