Ekrem Imamoglu, ish-kryebashkiaku i burgosur i Stambollit dhe rivali i mundshëm i presidentit turk Rexhep Tajip Erdogan, ka siguruar nominimin presidencial të partisë opozitare për zgjedhjet e vitit 2028, njoftoi të dielën Partia Popullore Republikane (CHP).
Kryetari i CHP, Ozgur Ozel tha se rreth 15 milionë njerëz votuan në zgjedhjet paraprake të partisë në mbështetje të kandidaturës së Imamoglu, pavarësisht arrestimit të tij në fillim të kësaj jave.
“Numri i votave që z. Ekrem Imamoglu ka marrë nga anëtarët tanë dhe kutia e votimit të solidaritetit është mbi 14.8 milionë,” tha Ozel në një tubim në Stamboll.
Votimi erdhi vetëm disa orë pasi Imamoglu u arrestua zyrtarisht dhe u pezullua nga detyra. Ai u arrestua të mërkurën në një hetim gjithëpërfshirës korrupsioni dhe tani përballet me akuza për zhvatje, ryshfet dhe lidhje të dyshuara me Partinë e jashtëligjshme të Punëtorëve të Kurdistanit (PKK), të cilën Turqia e cilëson një grup terrorist. Imamoglu ka mohuar të gjitha keqbërjet.
