Lamine Yamal i është përgjigjur Rafael van der Vaart pas kritikave të papritura që ish-mesfushori i Real Madridit dhe Tottenhamit i drejtoi ndaj talentit të Barcelonës.
Yamal reagoi ashpër ndaj komenteve të Van der Vaart me një festim brilant dhe një postim ironik në Instagram, pas triumfit të Spanjës në çerekfinalen e Nations League ndaj Holandës.
Fituesit e Euro 2024 e eliminuan ekipin e Ronald Koeman pas gjuajtjeve të penalltive, pas një barazimi 5-5 në total, duke siguruar një përballje në gjysmëfinale me Francën më 5 qershor.
Ndeshja e dytë përfundoi 2-2 në kohën e rregullt, falë një dygolëshi të Mikel Oyarzabal, ndërsa për Holandën shënuan Memphis Depay dhe Ian Maatsen.
Yamal realizoi një gol të jashtëzakonshëm në kohën shtesë, por një penallti e Xavi Simons e çoi ndeshjen te gjuajtjet nga pika e bardhë, ku La Roja doli fituese, pavarësisht se 17-vjeçari gaboi në gjuajtjen e tij.
Talenti i Barcelonës ka marrë shumë lëvdata për paraqitjet e tij të jashtëzakonshme që kur shpërtheu në skenë si 16-vjeçar, me Thierry Henry ndër ata që e kanë vlerësuar për pjekurinë e tij, pas një sezoni me 13 gola dhe 17 asistime për katalanasit.
Megjithatë, Van der Vaart e kritikoi publikisht pas ndeshjes së parë, duke e quajtur atë “sipërfaqësor”, duke pretenduar se ai u dominua nga mbrojtësi i majtë Jorrel Hato dhe madje edhe duke vënë në dyshim stilin e tij të veshjes.
“Janë disa gjëra që më bien në sy dhe më shqetësojnë pak. Pantallonat i ka më të ulura, nuk bën shumë përpjekje, gjeste paksa sipërfaqësore,” tha Van der Vaart për NOS.
“Kur je kaq i ri, duhet të jesh i lumtur për çdo minutë që luan me Spanjën. Nuk ka rëndësi sa i mirë je, në atë moshë duhet ta tregosh veten në çdo minutë dhe në çdo ndeshje. Por kjo nuk ndryshon faktin që Hato e mbajti atë plotësisht nën kontroll.”
Yamal i përgjigjet Van der Vaart
Pas golit të tij spektakolar për ta çuar ndeshjen në 3-2, Yamal uli pantallonat në mënyrë ironike për të thumbuar komentet e Van der Vaart, teksa shokët e tij të skuadrës e përqafonin.
Por Yamal nuk u ndal me kaq. Ai më pas vijoi “hakmarrjen” ndaj Van der Vaart me një postim viral në Instagram, ku ndau disa foto nga ndeshja me mbishkrimin:
“Pantallonat poshtë, gol i shënuar, penallti e humbur dhe në gjysmëfinale… Vamos, Spanjë!”
Në fund të postimit, ai përfshiu edhe screenshot-e të Van der Vaart duke u dukur i irrituar, krahas fotos së festimit të tij provokues.
Spanja do të përballet me Francën në gjysmëfinalen e 5 qershorit, pasi edhe ata fituan me penallti ndaj Kroacisë pas një barazimi 2-2 në total në Stade de France.
Ndërkohë, Gjermania dhe Portugalia do të përballen në gjysmëfinalen tjetër më 4 qershor, në Allianz Arena, Mynih
