Kreu i AAK-së, Ramush Haradinaj, ka reaguar me shqetësim për katër vrasjet në ditët e fundit, duke thënë se dora e shtetit duhet të ndihet.
Ai ka akuzuar edhe pushtetin se me mosrespektimin ndaj ligjit dhe institucioneve “po i trimëron” kriminelët.
“Kjo sjellje në masë është reflektim i institucioneve kryesore të shtetit, të cilët të parët nuk respektojnë rend, ligj e prokurori, duke i “trimëruar” kriminelët të të gjitha natyrave përmes amnistimit të sjelljes kriminale të shefit të shtetit. Ky është efekti zinxhiror i sjelljes banditeske nga i pari; Kosovën po e kthen në një shtet ku jeta dhe mirëqenia e qytetarëve janë jashtë kontrollit”, ka thënë Haradinaj.
Ai tha se siguria e qytetarëve të Kosovës duhet të jetë prioriteti numër një dhe se shembulli “duhet të vijë nga ata që kanë institucionet në duar”.
Haradinaj tha se Kosova ka humbur shumë jetë në luftë dhe as edhe një s’duhej të ndodhte në Kosovën e lirë.
“Është shqetësues niveli i vrasjeve kohët e fundit në Kosovë – katër në vetëm dy ditë. As edhe një nuk do duhej të ndodhte në Kosovën e lirë. Kemi humbur shumë jetë në luftë për të mos humbur as edhe një në paqe. Dora e shtetit duhet të ndihet, para së gjithash, në sigurimin e rendit dhe qetësisë. Kjo amulli në rritje, e përkthyer në dhunë dhe vrasje, nuk është Kosova që duam”.
“Ngushëllime familjarëve të viktimave, ngushëllime qytetarëve tanë”.
