Hamasi ka rënë dakord me një propozim për armëpushim të Gazës që mori dy ditë më parë nga ndërmjetësit Egjipti dhe Katari, tha të shtunën shefi i grupit militant palestinez.
“Dy ditë më parë, ne morëm një propozim nga ndërmjetësit në Egjipt dhe Katar. Ne e trajtuam atë pozitivisht dhe e pranuam,” tha Khalil al-Hayya në një fjalim televiziv.
“Ne shpresojmë që pushtimi (izraelit) nuk do ta dëmtojë atë,” tha Hayya, i cili drejton ekipin negociator të Hamasit në bisedimet indirekte që synojnë të sigurojnë një armëpushim në luftën Hamas-Izrael në Gaza që shpërtheu në tetor 2023.
Burime të sigurisë i thanë Reuters të enjten se Egjipti kishte marrë indikacione pozitive nga Izraeli mbi një propozim të ri armëpushimi që do të përfshinte një fazë kalimtare.
Propozimi sugjeron që Hamasi të lirojë pesë nga pengjet izraelitë që mban çdo javë, thanë burimet.
Zyra e kryeministrit izraelit tha se kishte zhvilluar një sërë konsultimesh sipas propozimit të marrë nga ndërmjetësit dhe se Izraeli u kishte përcjellë ndërmjetësuesve një kundërpropozim në koordinim të plotë me Shtetet e Bashkuara.
