Sekretari i Jashtëm i Mbretërisë së Bashkuar dha garanci për interesin e Britanisë në rajonin e Ballkanit Perëndimor gjatë një vizite në Kosovë të mërkurën, duke i nxitur si Kosovën ashtu edhe Serbinë të bëjnë përparim në bisedimet për normalizim, raporton agjencia ndërkombëtare e lajmeve, Associated Press.
David Lammy ishte në ditën e dytë të vizitës së tij në Kosovë, ku u takua me zyrtarë të lartë të vendit, duke i bërë thirrje Prishtinës ta formojë një qeveri të re sa më shpejt pas zgjedhjeve parlamentare të 9 shkurtit.
Lëvizja Vetëvendosje!, partia e kryeministrit Albin Kurti, fitoi 48 ulëve në parlamentin prej 120 ulësesh, duke mos e arritur shumicën.
Lammy u siguroi zyrtarëve kosovarë se “Mbretëria e Bashkuar vazhdon ta luajë rolin e saj thelbësor si një mike dhe partnere kyçe e këtij kombi të madh”.
Sekretari shprehu mbështetjen për bisedimet e normalizimit Kosovë-Serbi të ndërmjetësuara nga BE-ja.
“Ky është një rajon i rëndësishëm për Britaninë”, tha ai gjatë një konference pas takimit me presidenten Vjosa Osmani. “Ne duam një normalizim të qëndrueshëm dhe paqësor”.
Marrëdhëniet Kosovë-Serbi mbeten të tensionuara dhe bisedimet 14-vjeçare të ndërmjetësuara nga BE-ja nuk kanë arritur të përparojnë.
BE-ja dhe Shtetet e Bashkuara u kanë bërë thirrje Kosovës dhe Serbisë t’i zbatojnë marrëveshjet e arritura dy vjet më parë, të cilat përfshijnë angazhimin e Kosovës për krijimin e Asociacionit të Komunave me Shumicë Serbe dhe detyrimin e Serbisë për të ofruar njohje de facto të Kosovës
“Shpresoj që qeveria e ardhshme do t’i adresojë nevojat e të gjithë qytetarëve, duke përfshirë përparimin në integrimin e serbëve të Kosovës dhe angazhimin e fuqishëm në dialogun e udhëhequr nga BE-ja”, tha Lammy.
Rreth 11,400 njerëz humbën jetën në luftën e vitit 1998-1999 në Kosovë, shumica nga komuniteti shumicë shqiptar.
Një fushatë ajrore 78-ditore e NATO-s i dha fund luftimeve dhe i largoi forcat serbe nga Kosova.
Kosova e shpalli pavarësinë nga Serbia në 2008, një lëvizje që Beogradi dhe aleatët e tij kryesorë, Rusia dhe Kina, refuzojnë ta njohin
