Raketat ruse shënjestruan një lagje banimi me raketa balistike të premten në qytetin qendror të Ukrainës, Kryvyi Rih, duke vrarë të paktën 18 persona, përfshirë gjashtë fëmijë dhe duke plagosur 60 të tjerë.
Në mesin e të plagosurve kishte fëmijë, ku më i vogli ishte vetëm tre muajsh, i cili pësoi plagë si pasojë e sulmit. Banorët thonë se disa nga të plagosurit kanë marrë plagë kritike dhe e përshkruajnë sulmin si të tmerrshëm.
Presidenti i Ukrainës, Volodymyr Zelenskyy, denoncoi sulmet dhe shprehu ngushëllimet për familjet e të vdekurve dhe të plagosurve në një postim në kanalin e tij Telegram.
“Operacioni i shpëtimit vazhdon. Të paktën pesë ndërtesa janë dëmtuar. Sulmet ditore ruse. Viktimat ditore. Ekziston vetëm një arsye pse kjo vazhdon: Rusia nuk dëshiron një armëpushim dhe ne e shohim këtë,” tha Zelenskyy.
“E gjithë bota e sheh këtë. Çdo raketë, çdo dron sulmues dëshmon se Rusia dëshiron vetëm luftë. Dhe vetëm përmes presionit global ndaj Rusisë, përmes të gjitha përpjekjeve për të forcuar Ukrainën, mbrojtjen tonë ajrore dhe forcat tona, vetëm përmes kësaj lufta do të përfundojë,” shtoi ai.
Sulmi në qytetin e lindjes së Zelenskyt ndodhi në një kohë kur presidenti amerikan Donald Trump po përpiqet t’i japë fund luftës.
Ndërkohë presidenti francez Emmanuel Macron synon të përfaqësojë Evropën në negociatat me presidentin rus Vladimir Putin për paqen në Ukrainë. Kështu raporton Telegrafi. Sipas gazetës britanike, disa anëtarë të “koalicionit të vullnetarëve” po këmbëngulin që një lider evropian të udhëheqë kontaktet me Moskën si pjesë e përpjekjeve për të mbështetur Kievin.
Telegrafi shkruan se Macron dhe kryeministri britanik Keir Starmer janë identifikuar si bashkëbiseduesit më të mundshëm me Moskën. Megjithatë, Starmer thuhet se nuk ka plane për të zhvilluar bisedime me presidentin rus, ndërsa një burim nga Elysee tha se Macron ishte gati të merrte detyrën “kur të vijë koha”.
