Ismet Kryeziu, nga KDI, ka komentuar situatën politike në vend ku në diskutim është çështja e krijimit të qeverisë së re, duke thënë se diskursi politik e sjelljet që kanë partitë politike në vend, nuk i shërbejnë vlerave të demokracisë,
Kryeziu, ka përmendur qëndrimin e partive shqiptare që të mos kenë koalicion me Listën Serbe, duke deklaruar se një qasje e tillë përjashtuese dëmton proceset e ndërtimit dhe integrimit të një shoqërie të hapur, shumëetnike dhe të barabartë
‘‘Lëvizja Vetëvendosje, si subjekti i parë politik, duhet të heqë këto “vija të kuqe” dhe të ftojë në tryezën e diskutimeve edhe Listën Serbe. Jo vetëm Vetëvendosje, por çdo subjekt apo nismë politike që synon formimin e shumicës parlamentare, duhet të angazhohet për një proces gjithëpërfshirës dhe të hapur’’, ka thënë mes tjerash ai.
I njëjti ka theksuar edhe se përjashtimi i përfaqësuesve të komunitetit serb nga vendimmarrja për shkak të kalkulimeve elektorale, paraqet një sfidë serioze për mozaikun kushtetues.
Postimi:
Diskursi politik dhe sjelljet e partive politike të kohëve të fundit, veçanërisht qëndrimi i pothuajse të gjitha partive shqiptare se me Listën Serbe nuk duhet të bëhet koalicion, nuk i shërbejnë as patriotizmit, e as vlerave të demokracisë që Kosova synon të ndërtojë dhe përfaqësojë.
Përkundrazi, një qasje e tillë përjashtuese dëmton proceset e ndërtimit dhe integrimit të një shoqërie të hapur, shumëetnike dhe të barabartë, thelb i një shteti demokratik, ashtu siç synon të jetë edhe shoqëria jonë. Përjashtimi i përfaqësuesve të komunitetit serb nga vendimmarrja dhe negociatat për formimin e qeverisë, për shkak të kalkulimeve elektorale, paraqet një sfidë serioze për mozaikun kushtetues, juridik dhe politik të vendit.
Lëvizja Vetëvendosje, si subjekti i parë politik, duhet të heqë këto “vija të kuqe” dhe të ftojë në tryezën e diskutimeve edhe Listën Serbe. Jo vetëm Vetëvendosje, por çdo subjekt apo nismë politike që synon formimin e shumicës parlamentare, duhet të angazhohet për një proces gjithëpërfshirës dhe të hapur, në përputhje me frymën demokratike dhe obligimet kushtetuese të vendit
