Inter Miami është kualifikuar për herë të parë në gjysmëfinalet e CONCACAF Champions Cup pasi Lionel Messi udhëhoqi një rikthim dramatik me tre gola kundër Los Angeles FC (LAFC).
Ylli argjentinas shënoi dy gola, përfshirë edhe penalltinë vendimtare në minutën e 84-të, duke i dhënë fitoren Inter Miami-t me rezultatin 3-1 ndaj LAFC të mërkurën në mbrëmje dhe një fitore totale 3-2 në dy ndeshjet.
“Dhamë gjithçka nga vetja,” tha trajneri i Inter Miami, Javier Mascherano. “E dëshironim shumë, donim të ishim në gjysmëfinale, dhe mendoj se kjo u pa. … Shpeshherë duhet të jesh me fat, dhe këtë herë fati ishte me ne.”
Inter Miami e kishte humbur ndeshjen e parë në fushën e LAFC me rezultatin 1-0 javën e kaluar, kështu që goli i Aaron Long në minutën e nëntë të ndeshjes së dytë befasoi Inter Miami-n dhe shumë herët i dha LAFC një epërsi totale 2-0.
Kjo do të thoshte që Inter Miami duhej të shënonte të paktën tre gola për të kaluar më tej. Dukej e vështirë.
Por me Messin – fitues i tetë herë i Topit të Artë – gjithçka është e mundur.
Messi nisi rikthimin në minutën e 35-të, duke gjetur hapësirë pranë zonës së 16 metrave dhe barazuar rezultatin në 1-1, duke i dhënë vrull përmbysjes së Miami-t.
Pas minutës së 60-të, Allen mori një pasim nga Messi jashtë zonës së Los Angeles dhe goditi topin në drejtim të portës. Topi shmangu të gjithë dhe përfundoi në rrjetë.
Inter Miami vazhdoi të ushtronte presion gjatë gjithë ndeshjes dhe më pas arriti të fitonte një penallti pas një ndërhyrjeje me dorë në minutën e 84-t, të cilën Messi e ktheu në gol për rezultatin 3-1 dhe kalimin në gjysmëfinale. Ky ishte goli i tij i 42-të në 48 paraqitje në të gjitha garat që kur iu bashkua Inter Miami-t.
“Kjo është mënyra,” tha Mascherano. “Kjo është mënyra për të luajtur futboll. … Ata dhanë gjithçka. Jam shumë i lumtur.”
Portieri Oscar Ustari bëri dy pritje të mëdha në minutat e fundit për Inter Miami-n, që tani do të përballet me klubin meksikan Pumas ose me Vancouver ëhitecaps në gjysmëfinalet e turneut të CONCACAF.
Ndeshja e parë e këtij çifti është planifikuar të luhet më 22, 23 ose 24 prill.
