Gjykata Kushtetuese ka pranuar pjesërisht ankimin e ish-zv.kryeministrit Arben Ahmetaj, duke shfuqizuar një pjesë të vendimeve për sekuestrimin e pasurive të tij dhe duke rikthyer çështjen për shqyrtim në Gjykatën e Posaçme të Apelit për Korrupsionin dhe Krimin e Organizuar.
Vendimi i Kushtetueses përfshin lirimin nga sekuestro i një apartamenti në rrugën “Reshit Çollaku” në Tiranë, si dhe një llogarie bankare dhe një depozite pranë bankës “Intesa SanPaolo”. Sipas njoftimit zyrtar, “Gjykata vendosi pranimin pjesërisht të kërkesës, shfuqizimin e vendimeve përkatëse të Apelit dhe Gjykatës së Lartë, si dhe dërgimin e çështjes për rishqyrtim”.
Arben Ahmetaj ndodhet në arrati që prej korrikut të vitit 2023, ndersa mbi pasuritë e tij është ushtruar një hetim pasuror i thelluar dhe janë vendosur në sekuestro disa prona të paluajtshme, përfshirë dy vila, disa apartamente dhe llogari bankare.
