Kryeministri i Shqipërisë, Edi Rama, ndodhet këtë të hënë në Bruksel, ndërsa pasdite do të shkojë në Luksemburg për të marrë pjesë në Konferencën e Katërt Ndërqeveritare BE-Shqipëri.
Gjatë një daljeje para mediave me Presidentin e Këshillit Evropian, Antonio Kosta, Rama theksoi angazhimin e tij të plotë për realizimin e detyrave të Shqipërisë dhe mbylljen e negociatave me Bashkimin Evropian deri në vitin 2027.
Në fjalën e tij, Rama theksoi se një nga temat kryesore të bisedimeve me Kostën ishin dhe zhvillimet në rajonin e Ballkanit, ku presidenti i Këshillit Evropian i shprehu një përkushtim të madh për stabilitetin dhe progresin e rajonit.
“Jam i kënaqur që gjendem sot me presidentin e Këshillit Evropian, Antonio Kosta. Sigurisht, është një ditë shumë e mirë për ne, sepse hapim kapituj të tjerë në negociatat me BE-në. Jam mirënjohës për kohën që ai më ka kushtuar për të zhvilluar një bisedë të hapur për përparimin që po bëjmë në këtë proces. Gjatë bisedës, diskutuam edhe për Samitin e ardhshëm të Komunitetit Politik Evropian, një aktivitet i rëndësishëm për rajonin. Presidenti Kosta është shumë i përkushtuar për zhvillimet në Ballkan dhe ka shumë për të diskutuar, por në përgjithësi jam i inkurajuar nga këto zhvillime. Jemi të përkushtuar maksimalisht për të përmbushur të gjitha detyrat e kalendarit të ambicioz dhe për të mbyllur negociatat brenda vitit 2027,” tha Rama.
