Historia e Shekip Fazliut në pozitat e larta të Telekomit lulëzoi në kohën kur PDK-ja, AAK-ja dhe Nisma Socialdemokrate ishin në pushtet.
Hiset që këto parti ndanin asokohe, ndaheshin sipas përqindjeve. Sekretari i Korporatës i takonte atëbotë Nismës Socialdemokrate, pozita e shefit të financave AAK-së, ndërsa ajo e auditimit PDK-së.
Edhe pse Bordit të atëhershëm të Telekomit iu deshën tre muaj, më 20 mars të vitit 2019, me unanimitet vendosi në krye të Telekomit Shekip Fazliun, në atë kohë kryetar i degës së Nismës në Skenderaj.
Opozita e atëhershme, Lëvizja Vetëvendosje, bëri shumë zhurmë për këtë emërim. Megjithatë, duket se puna e tij u pëlqye, sepse gjatë dy mandateve të qeverisjes së Vetëvendosjes, Fazliu ka marrë edhe dy mandate të tjera për pozitën e sekretarit të Korporatës.
Mandatin e dytë e mori më 8 prill të vitit 2022, mandat ky që përfundoi më 7 prill të këtij viti. Dhe sërish, mandati i tretë iu dha “si dhuratë”, pa shpallur fare konkurs nga Telekomi.
I kontaktuar nga Kiks Kosova, vetë Fazliu ka pranuar se ka marrë mandatin e tretë në Korporatë, duke theksuar se Bordi ka vendosur emrin e tij duke u bazuar në ligj.
Por një gjë e tillë nuk qëndron, të paktën me ligj.
Kiksi ka tentuar të kontaktojë edhe me kryesuesin e Bordit, Petrit Nahi, por ai ka qenë i paqasshëm. Ndërkohë, anëtarja tjetër e Bordit, Saime Thaçi, nuk ka dashur të flasë, duke u arsyetuar se ndodhet në punë.
Në anën tjetër, kryeshefja e Telekomit, Burbuqe Hana, është dukur e nervozuar. Ajo ka refuzuar të japë deklaratë për këtë emërim, duke theksuar se kompania ka një zyrë për marrëdhënie me publikun që merret me kthimin e përgjigjeve për media.
Ndryshe nga Telekomi, dy ndërmarrje të tjera publike tashmë i kanë përzgjedhur sekretarët e tyre duke respektuar Ligjin për Ndërmarrjet Publike.
Në tetor të vitit 2024, Posta e Kosovës kishte shpallur konkurs për sekretar të korporatës, i cili, bazuar në rregullat e shërbimit publik, kishte qenë i hapur për më shumë se 15 ditë.
E njëjta procedurë ishte ndjekur edhe nga Korporata Energjetike e Kosovës, e cila pozitën e lirë për sekretar të Korporatës e kishte shpallur në fillim të dhjetorit të vitit 2024.
Por, arsyetimi i Fazliut se ligji i jep të drejtë Telekomit të përzgjedhë sekretarin pa konkurs publik nuk qëndron.
Kjo, sepse neni 13 i Ligjit për Plotësim-Ndryshimin e Ligjit për Ndërmarrjet Publike thotë qartë se procedurat për këto pozita duhet të jenë transparente dhe publike.
”Për përzgjedhjen e personave për emërim si zyrtarë të NP-së, Bordi i Drejtorëve duhet të kryejë një procedurë të hapur, transparente dhe konkurruese, e cila ka për qëllim që të gjitha emërimet të bëhen ekskluzivisht në bazë të meritës. Bordi i Drejtorëve duhet të sigurojë që të gjithë personat e emëruar si zyrtarë të jenë persona me integritet të njohur, të cilët i plotësojnë kushtet e kualifikimit sipas nenit 17.1.”
Për të qenë korrekt, Kiks Kosova ka dërguar pyetje edhe në Telekomin e Kosovës, por nuk ka marrë përgjigje.
Nga Zyra për Komunikim me Publikun në Telekom na është thënë se pyetjet janë deleguar te Bordi, por drejtori i Bordit ndodhet jashtë vendit dhe nuk kthehet deri nga mesi i javës.
Sidoqoftë, Shekip Fazliu tashmë nuk është më pjesë e Nismës Socialdemokrate. Ai ka thënë për Kiksin se është rehatuar në punën e tij dhe nuk ka ndërmend të merret më me politikë.
