Instituti Demokratik i Kosovës (KDI) ka kërkuar nga kryeministri në detyrë Albin Kurti dhe ministrat në detyrë të japin dorëheqje formalisht, për ta zhbllokuar konstituimin e Kuvendit.
Nëpërmjet një komunikate për media KDI ka shprehur shqetësim të thellë për dështimin e përsëritur të Kuvendit për të miratuar raportin e Komisionit të Përkohshëm për Verifikimin e Mandateve, një ndër hapat e domosdoshëm drejt konstituimit të Kuvendit dhe fillimin e punës së legjislaturës së re.
KDI thekson se ‘mosdorëheqja formale e kryeministrit dhe ministrave në detyrë të cilët janë zgjedhur deputetë, përveçse shkelje e qartë e parimeve të ndarjes së pushteteve, po pamundëson votimin e raportit, duke cenuar drejtpërdrejt funksionalitetin institucional të Kuvendit’, thuhet në reagimin e kësaj organizate.
