Mungesën e mbështetjes në Kuvendin e Kosovës për kandidaten e propozuar për kryeparlamentare tashmë Lëvizja Vetëvendosje po tenton ta shndërrojë në çështje gjinore.
Vetë deputetja Albulena Haxhiu u ankua për mizogjini pasi dështoi edhe në votimin e tretë që të zgjidhej kryeparlamentare në mungesë të votave të mjaftueshme.
Ajo u ankua se opozita i tha asaj “figurë përçarëse, konfliktuoze, monstrum politik, terroriste politike, specie e përçudnuar”.
“Kjo gjuhë është e papranuehsme, jo që po bëhet ndaj meje, por ndaj kujtdo qoftë. Kjo gjuhë mizogjene, seksiste, dekurajon gratë tjera që të merren me politikë. Sepse ku shohin përbaltjet e grave, mendojnë para se të merren me politikë”, tha sot Haxhiu.
Në këtë narrativë po flasin edhe bashkëpartiakët e saj.
Deputeti Dimal Basha e quajti këtë “fatkeqësi që edhe gratë” po dalin kundër Haxhiut dhe thotë se këtë e bënë “pa asnjë arsye”
“Fatkeqësi që edhe gratë pa asnjë arsye po dalin kundër Albulena Haxhiut me 126 mijë vota, gruas më të votuar në zgjedhjet e vitit 2025! Nuk kanë vërejtje, por po na thonë s’po i pëlqen opozitës, e duhet me ndërru. Pra janë t’gatshme me shkel avancimin e një gruaje me 126 mijë vota, veç për me përkrah kundërshtimin banal të opozitës. Çka me thanë, fatkeqësi!”.
Më herët, para se të fillonte seanca edhe deputetja Saranda Bogujevci e lidhi mospranimin e opozitës për Albulena Haxhiun me gjininë.
“Pse përcarëse? Pse ka qenë e zëshme, pse s’është zmbrapsur kurrë? Kur vjen puna te një grua kur është e zëshme qenka përçarëse? Pse s’është diskursi i njëjtë në raport me burrat? E kemi mundësinë e artë ta kemi një kryetare të Kuvendit dhe një grua që besoj shumë në përfaqësimin më të mirë të mundshëm”, tha ajo para gazetarëve.
Sidoqoftë, partia Aleanca për Ardhmërinë e Kosovës – e vetmja nga partitë opozitare që tregoi se kush do të ishte e pranueshme për ta – propozoi dy emra grash, Saranda Bogujevcin dhe Shqipe Selmin për kryetare të Kuvendit si një “ndihmesë” për të dalë nga bllokada në të cilin është futur Kuvendi
