Djali i madh i presidentit të ShBA-së, Donald Trump Jr, do të takohet të premten me ministrin e jashtëm hungarez, Peter Szijjarto, në Budapest tha ministria e jashtme e Hungarisë.
Nuk ishte e qartë nëse vizita e Trump Jr ishte në ndonjë mënyrë e lidhur me një marrëveshje të mundshme biznesi. Si nënkryetar ekzekutiv në Organizatën Trump, Donald Jr. punon për të zgjeruar interesat e kompanisë në pasuri të paluajtshme, shitje me pakicë, komerciale, hoteliere dhe golf, sipas faqes së internetit të Organizatës Trump.
Ministria nuk e zbuloi qëllimin e vizitës dhe zyrtarët nuk ishin menjëherë të disponueshëm për komente.
Bloomberg raportoi vonë të mërkurën se Trump Jr do të vizitojë Evropën Lindore këtë javë, ndërsa po kërkon të zgjerojë lidhjet e biznesit të familjes së tij.
Bloomberg raportoi se djali i Trump do të vizitojë Serbinë, Rumaninë dhe Bullgarinë.
Trump Jr u takua me Presidentin e Serbisë Aleksandar Vuçiç në Beograd muajin e kaluar.
Vizita në Serbi pasoi një marrëveshje të vitit të kaluar midis qeverisë serbe dhe firmës së investimeve të Jared Kushner me seli në SHBA, Affinity Global Development, për të ndërtuar një hotel në vendin e ish-selisë së Ushtrisë Popullore Jugosllave që u dëmtua gjatë një fushate bombardimi të NATO-s në vitin 1999 kundër ish-Jugosllavisë. Kushner është dhëndri i Presidentit Trump.
Kryeministri Viktor Orban, një aleat i hershëm i Trump, tha javën e kaluar se Hungaria pret të nënshkruajë një marrëveshje biznesi me SHBA-në brenda gjashtë muajsh që mund të ndihmojë në kompensimin e ndikimit të mundshëm të tarifave të vendosura nga Presidenti Trump.
Tarifat do të godisnin ekonominë e Hungarisë për shkak të varësisë së saj nga sektori i prodhimit të makinave
