Sot, për herë të gjashtë radhazi, Kuvendi i Kosovës ka dështuar të konstituohet, pasi që kandidatja e Lëvizjes Vetëvendosje për kryetare të Kuvendit, Albulena Haxhiu, s’ka arritur përsëri t’i marrë votat e nevojshme që kërkohen. Pas seancës, partitë akuzuan VV-në për bllokadë. Ndërsa nga kjo e fundit, më saktësisht, deputetja Mimoza Kusari, paralajmëroi zgjedhje, përmes një interpretimi të saj,
Kusari në deklarimin e saj para mediave tha se situata e tanishme në të cilën gjendet Kuvendi s’mund të shkojë në pafundësi, duke përmendur një afat kohor prej 30 ditësh, brenda se cilit, sipas saj, duhet të konstituohet Kuvendi, ose vendi shkon në zgjedhje të reja.
Rreth kësaj, për Gazetën Express, është prononcuar njohësi i këtyre çështjeve, Eugen Cakolli.
Cakolli në prononcimin e tij, hodhi poshtë deklarimet e Kusarit, duke thënë se aktgjykimi i Gjykatës Kushtetuese i vitit 2014, thekson se moskonstituimi i Kuvendit nuk prodhon zgjedhje të reja.
‘‘Atëherë edhe pse Kuvendi është tashmë në një bllokadë institucionale dhe politike, në fakt aktgjykimi i Gjykatës Kushtetuese i vitit 2014 e ka bërë të qartë se moskonstituimi i Kuvendit nuk prodhon zgjedhje të jashtëzakonshme. Rrjedhimisht edhe sikur të kishte vullnet e gatishmëri për të shkuar në zgjedhje, rruga e zgjedhjeve kalon përmes konstituimit të kuvendit fillimisht’’, tha ai.
Ai, i cilësoi si të paqëndrueshme komentet e Kusarit, duke thënë se afati 30 ditor është për thirrjen seancës e jo domosdoshmërish për konstituimin e kuvendit.
‘‘Prandaj besoj që janë të paqëndrueshme dhe të pasakta pretendimet që kanë qarkulluar në fakt kohëve të fundit se nëse Kuvendi nuk konstituohet brenda afatit 30 ditor kjo nënkupton shkuarjen në zgjedhje. Për shkak se realisht Kuvendi dhe afati në këtë rast për seancën konstituive ka të bëjë vetëm me thirrjen e seancës si të tillë, por jo medoemos edhe me përmbylljen e saj. Këtë e ka sqaruar Gjykata Kushtetuese në vitin 2014’’, ka shtuar Cakolli
Në fund, Cakolli theksoi edhe njëherë se zgjedhjet nuk mund të mbahen pa konstituimin e kuvendit, kësisoj të njëjtat s’mund të mbahen pa formimin e këtij institucioni.
‘‘Absolutisht. Edhe nëse ka interes për të shkuar drejt zgjedhjeve, rruga e zgjedhjeve kalon përmes konstituimit të Kuvendit. Kështu që nuk ka mundësi të shkuarjes në zgjedhje në rast nëse nuk konstituohet Kuvendi si i tillë’’, ka përfunduar ai .
Ndryshe, sot është mbajtur për herë të gjashtë seanca për konstituimin e Kuvendit, ku deputeti dhe lideri i VV-së, Albin Kurti, dështoi sërish që të siguroi votat për Albulena Haxhiun, për kryetare të parlamentit.
E njëjta morri 57 vota për; 47 vota kundër dhe tre abstenime.
Seanca e radhës është thirrur për të dielën, me datë 27 prill, nga ora 10:00
