Jalen Brunson shënoi 40 pikë – përfshirë një trepikësh vendimtar – duke i dhënë fitoren New York Knicks me rezultat 116-113 ndaj Detroit Pistons dhe duke vulosur kualifikimin me rezultat të përgjithshëm 4-2 në seri.
28-vjeçari, i cili javën e kaluar u shpall “Lojtari më vendimtar i vitit” (Clutch Player of the Year), realizoi koshin vendimtar me vetëm 4.3 sekonda të mbetura në lojë, duke siguruar fitoren në ndeshjen e gjashtë.
Kjo fitore do t’i përballë Knicks me kampionët në fuqi dhe 18-herë fituesit e titullit, Boston Celtics, në gjysmëfinalet e Konferencës Lindore në play-off.
Brunson përfundoi ndeshjen me katër kërcime dhe shtatë asistime, përveç 40 pikëve të tij, ndërsa Mikal Bridges shënoi 25 pikë dhe OG Anunoby shtoi 22 pikë në arenën “Little Caesars” në Detroit.
James Harden realizoi 28 pikë ndërsa Los Angeles Clippers e çuan serinë kundër Denver Nuggets në ndeshjen e shtatë, pas një fitoreje 111-105 në Inglewood, Kaliforni.
Clippers duhej të fitonin në ndeshjen e gjashtë për të mbajtur gjallë shpresat për kualifikim, por patën vështirësi përballë një paraqitjeje të shkëlqyer të Nikola Jokic, i cili kontribuoi me 25 pikë, tetë asistime dhe shtatë kërcime për Denverin.
Megjithatë, Harden ishte ylli i ndeshjes, duke shtuar edhe tetë asistime dhe gjashtë kërcime, teksa Clippers synojnë titullin e tyre të parë në NBA.
