Prishtinë, 6 maj 2025 – Në përvjetorin e 26-të të vrasjes së intelektualit dhe politologut të njohur shqiptar, Prof. Fehmi Agani, kryetari i Lidhjes Demokratike të Kosovës (LDK), Lumir Abdixhiku, ka përkujtuar me nderim dhe mirënjohje figurën e tij madhore, duke e cilësuar si një nga shtyllat themelore të lëvizjes paqësore për liri dhe pavarësi të Kosovës.
“Më 6 maj të vitit 1999, Kosova humbi njërin nga veprimtarët e mëdhenj – Prof. Fehmi Aganin, intelektualin e urtë, politologun vizionar, sociologun dhe atdhetarin e paepur,” u shpreh Abdixhiku. Ai theksoi se vrasja e Aganit nga forcat serbe ishte një plagë e rëndë për vendin dhe përpjekje për të goditur mendimin kritik dhe strategjinë e arsyes në ditët më të vështira për popullin shqiptar të Kosovës.
Prof. Fehmi Agani ishte një nga themeluesit e LDK-së dhe bashkëpunëtor i ngushtë i presidentit historik, Ibrahim Rugova. Si nënkryetar i kësaj partie dhe ideator i strategjisë paqësore, ai u bë zëri i urtësisë, duke udhëhequr me mençuri drejt një të ardhmeje të lirë dhe të pavarur.
Në fjalën e tij përkujtimore, kryetari i LDK-së theksoi gjithashtu rolin e pazëvendësueshëm të Aganit si profesor i dalluar në Universitetin e Prishtinës. “Ai edukoi dhe formoi me përkushtim breza të tërë studentësh që më vonë u bënë prijës të lëvizjes për liri,” tha Abdixhiku, duke shtuar se ligjëratat e Aganit përçuan ndjenjën e krenarisë dhe të rezistencës në një kohë të rëndë për shqiptarët.
“Sot, në 26 vjetorin e vrasjes së tij, e kujtojmë me pietet figurën e tij madhore dhe veprën e tij. Trashëgimia që ai la pas është udhërrëfyes i përhershëm në rrugëtimin tonë për ndërtimin e një Kosove me një të ardhme më të mirë, të drejtë dhe të denjë për sakrificat e bijve më të mirë të saj,” përfundoi Abdixhiku.
Lavdi jetës dhe veprës së Prof. Fehmi Aganit!
