Prishtinë – Aktivisti dhe analisti publik, Lirim Mehmetaj, ka ngritur akuza serioze ndaj një hetuesi policor të përfshirë në hetimet kundër Ministrit të Bujqësisë, Faton Peci. Sipas Mehmetajt, hetuesi Rrahman Perçuku, i cili aktualisht është pjesë e hetimeve për afera të mundshme korruptive që përfshijnë ministrin Peci, ka qenë vetë përfitues i një granti nga kjo ministri në vitin 2022.
“Në video i keni faktet, listën e përfituesve dhe gjithçka tjetër,” deklaroi Mehmetaj në një postim publik. Ai shton se ka pasur dyshime për konflikt interesi që nga momenti kur ka dëshmuar në polici dhe hetuesi në fjalë ka mbrojtur, sipas tij, ministrin Peci në vend që të ishte i paanshëm.
“Paramendojeni dikë që nuk e ka qasjen time në informacion dhe shkon të dëshmojë para këtij Perçukut. Veç paramendojeni,” shprehet Mehmetaj.
Për më tepër, ai ngre shqetësime për mënyrën se si trajtohet anonimiteti i dëshmitarëve në këtë rast, duke thënë se i është bërë me dije se anonimati i zyrtarëve të ministrisë që mund të dëshmojnë “nuk do të ruhet”.
Një tjetër element shqetësues, sipas tij, është deklarata publike e ministrit Peci, e bërë disa ditë pas dëshmisë së Mehmetajt, në të cilën ai i kërkon këtij të fundit të “tregojë çfarë ka deklaruar në polici”. “Ku e dinte ky çfarë kam deklaruar unë?”, pyet Mehmetaj, duke sugjeruar një rrjedhje të mundshme të informatave konfidenciale nga hetuesia te subjekti i hetuar.
Akuzat e ngritura nga Mehmetaj, nëse provohen, do të ngrinin seriozisht shqetësime për integritetin e procesit hetimor dhe për pavarësinë e institucioneve të drejtësisë.
Deri në momentin e publikimit të këtij artikulli, Ministria e Bujqësisë dhe Policia e Kosovës nuk kanë dhënë ndonjë reagim zyrtar mbi këto pretendime.
Redaksia do të ndjekë zhvillimet rreth kësaj çështjeje dhe do të kërkojë përgjigje nga institucionet përkatëse.
