Chelsea ka siguruar vendin e saj në finalen e Ligës së Konferencës pas një triumfi të lehtë në gjysmëfinale ndaj Djurgarden në Stamford Bridge.
Pavarësisht se Enzo Maresca bëri 10 ndryshime krahasuar me fitoren ndaj Liverpool-it dhe aktivizoi për herë të parë titullar 16-vjeçarin Reggie Walsh, “Blutë” e Londrës nuk e patën aspak të vështirë të kompletonin fitoren me rezultat të përgjithshëm 5-1 kundër suedezëve.
Chelsea do të përballet në finalen e madhe me fituesin e çiftit Fiorentina–Real Betis, me ndeshjen finale që do të luhet në qytetin polak të Wroclaw më 28 maj.
Pas fitores 4-1 në Suedi javën e kaluar, Chelsea e shtoi epërsinë falë një goli të Kiernan Dewsbury-Hall, i cili goditi saktë në këndin e poshtëm pas një pasimi nga Tyrique George.
Pavarësisht mbështetjes së zjarrtë të tifozëve suedezë, Djurgarden nuk mundi të bënte mrekulli, ndërsa Maresca dha minuta edhe për të rinjtë Shim Mheuka dhe Genesis Antwi, të dy 17-vjeçarë.
Kjo do të jetë finalja e tetë europiane në historinë e Chelsea-t dhe e para që nga triumfi në Champions League ndaj Manchester City-t në vitin 2021 nën drejtimin e Thomas Tuchel. Për trajnerin Maresca, kjo është një mundësi e artë për të fituar trofeun e parë jo vetëm në epokën e tij te Chelsea, por edhe në periudhën pas largimit të Roman Abramovich
